Arqalyqta otpen oınaǵan balalar turǵyn úıdi órtep jiberdi
QOSTANAI. QazAqparat – Arqalyq qalasynda turǵyn úı órtenip, 30 adam evakýatsııalandy, dep habarlaıdy QazAqparat Qostanaı oblysy TJD Іshki jáne syrtqy kommýnıkatsııalar qyzmetine silteme jasap.
«Arqalyq qalasy Baıtursynov kóshesindegi turǵyn úı órti týraly aqparat 9 qarasha kúni saǵat 20:51-de kelip tústi. Kórshiler 2-qabattaǵy páterden tútin shyqqanyn habarlady. Saǵat 20:55-te oqıǵa ornyna quramynda 2 arnaıy órt sóndirý tehnıkasy, 1 AL-30 avtosaty jáne jeke quramnyń 11 qutqarýshysy bar №4 MÓSB órt sóndirý jasaǵy jetti. 2-qabattaǵy páterde 60 sharshy metr alańda úı zattary men jıhaz janyp jatqany anyqtaldy. Órt saldarynan paıda bolǵan tútin kireberiste tez tarala bastady jáne joǵary qabattaǵy turǵyndardyń jolyn bógedi», - deıdi TJD baspasóz hatshysy Ýálıhan Dosanov.
Avtosaty kómegimen 5-qabattyń balkondarynan 19 adam, onyń ishinde 13 bala qutqaryldy. Sonymen qatar, baspaldaqtar arqyly 11 adam oqshaý aýmaqqa evakýatsııalandy.
«Gaz-tútinnen qorǵaý qyzmetiniń 2 býyny 21:26-da órtti aýyzdyqtady. Taǵy 30 mınýt ishinde órt sóndirýshiler óz jumystaryn jalǵastyryp, órtti tolyǵymen joıdy. Arqalyq aýrýhanasyna 4 adam jatqyzyldy, olardyń biri – 2014 jyly týǵan bala. Dárigerler zardap shegýshilerge ýlaný dıagnozyn qoıdy», - deıdi Ý.Dosanov
Aldyn ala boljam boıynsha, órt balalardyń otpen oınaýynan bolǵan.
