Arqalyqta myńnan asa adam jumyspen qamtyldy
QOSTANAI. QazAqparat - Arqalyq qalasynyń ákimi Amantaı Balǵarın qalanyń ótken 10 aıdaǵy áleýmettik-ekonomıkalyq damý barysyn baıandady, dep habarlaıdy QazAqparat tilshisi.
Jyl basynan beri qalanyń kásiporyndarymen ónerkásip óniminiń kólemi 5 mlrd 887 mln teńge qurady. Bul byltyrǵy jylmen salystyrǵanda 1 mlrd teńgege kem. Al ónerkásip óniminiń naqty kólemi - 86,3%.
Sondaı-aq, aýyl sharýashylyǵy salasynda da irkilis bar. Aýylsharýashylyq óniminiń jalpy shyǵarylymy 10 mlrd 899 mln teńge boldy. 2016 jyldyń dál osy kezeńinde bul kórsetkish 12 mlrd 565 mln teńgege saı edi.
«Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda aıtylǵandaı, agrarlyq sektor el ekonomıkasy ósiminiń negizgi draıveri bolýy kerek. Arqalyq qalasy óndiris kóleminiń 65%-y aýylsharýashylyq salasyna, 35%-y óndiristik salaǵa tıesili. Aýylsharýashylyq óniminiń jalpy kóleminiń ındeksi 91,1% kórsetkishke jetti. Qalada shaǵyn jáne orta bıznes sýbektileriniń 2065 birligi tirkelgen. Qala bıýdjetine shaǵyn jáne orta bıznesten 1 mlrd 7 mln teńge salyq tústi», - deıdi Balǵarın.
Qala ákiminiń sózine súıensek, aǵymdaǵy jyldyń basynan bastap memleketik baǵdarlamalar sheńberinde 24 kásipker jalpy somasy 126 mln teńgeden asatyn qoldaýǵa ıe boldy. Jańadan 60 jumys orny ashylǵan.
Qala boıynsha bir jumyskerdiń 2017 jylǵy qańtar-qazan aılary boıynsha orta aılyq eńbek aqysy 89579 teńgeni qurady. Bul byltyrǵy jylmen alyp qaraǵanda 4120 teńgege artyq. Esepti kezeń boıynsha 1203 adam jumyspen qamtyldy, munyń syrtynda 155 adam qysqa merzimdi kásipkerlik oqýyna, 184 adam áleýmettik jumys oryndaryna jiberildi.
Turǵyn úı-kommýnaldyq salasynda da kóńil kónshiterlik kórsetkishter jeterlik.
«2016-2017 jyldarǵa arnalǵan jylytý maýsymyna 3713 tonna kómir jetkizildi. QR Úkimet Rezervi jáne oblystyq bıýdjeti esebinen qalaǵa jalpy kólemi 19 myń 121,1 tonna otyn mazýtyn satyp alýǵa 1 mlrd 219,3 mln.teńge somasynda qarajat bólindi», - dep túıindedi qala ákimi.
