Arqalyqta qaıys buıymdaryn shyǵaratyn óndiris orny ashylmaq

NUR-SULTAN. QazAqparat –Arqalyq qalasynda qaıys er-toqym buıymdaryn shyǵaratyn óndiris salynady, dep habarlaıdy QazAqparat tilshisi.

Bul týraly oblys ákimi Arhımed Muhambetov Úkimet otyrysynda aıtty. Óńirdegi shaǵyn jáne orta bıznesti damytýǵa baǵyttalǵan sharalar týraly aqparat bergen ákim Arqalyq qalasynda jeńil ónerkásipti damytýdyń keleshegi mol ekenin atady.

«Qostanaı qalasynda ındýstrııalyq aımaq salynyp otyr. Qazir ondaǵy zaýyttardyń qurylysy qarqyndy júrip jatyr. Aıta ketetin másele, osy ındýstrııalyq aımaqqa kommýnıkatsııa ótkizýge jumsalǵan bıýdjettiń árbir teńgesine 38 teńge ınvestıtsııa tartyldy. Arqalyq monoqalasynda bıznesti damytý jónindegi naqty sharalar kóńil bólinip otyr. Qazirdiń ózinde oń nátıje kórsete bastady. Mysaly, uzaq jyldar boıy jumys istemeı turǵan teri daıyndaýmen jáne qaıta óńdeýmen aınalysatyn «Úmit» kásiporny reanımatsııalanyp, iske qosyldy. Qazirgi tańda naqty jumys istep tur. Qazaqstandyq, reseılik jáne ózbekstandyq kompanııalarmen ónim jetkizý sharttaryn jasasty. Eksportqa jiberip jatyr. Sonyń arqasynda biz 50 jumys ornyn ashtyq», - dedi aımaq basshysy.

Sondaı-aq ol atalǵan kásiporynnyń janynda arnaıy kıim tigip, teri daıyndaıtyn shaǵyn kásiporyndar jelisin qurylyp jatqanyn atap ótti.

«Osy tájirıbeni eskere otyryp, Amangeldi, Jangeldın jáne Naýryzym aýdandarynda teri daıyndaý ortalyqtaryn jaqyn arada ashamyz. Sondaı-aq Arqalyq qalasynda aıaq kıim, bylǵar galantereıa jáne qaıys er-toqym buıymdarynyń óndirisin uıymdastyrýdy josparlap otyrmyz. Sonymen birge «ERG» kompanııalar tobynyń Torǵaı boksıt ken basqarmasynyń ǵımarattary bosady. Qazir solardy biz bıznes ınkýbatorǵa aınaldyryp jatyrmyz», - dedi Arhımed Muhambetov.

Aıta keteıik, Úkimet otyrysynda QR Premer-Mınıstri Álıhan Smaıylov «Qarapaıym zattar ekonomıkasy» baǵdarlamasynyń jalǵasatynyn jetkizdi.