Arqalyqta eki sábıdiń ólimine alyp kelgen órttiń sebebi anyqtaldy
ASTANA. QazAqparat - Eki sábıdiń ólimine sebepshi bolǵan Qostanaı oblysy Arqalyq qalasyndaǵy órttiń tehnıkalyq sebepteri anyqtaldy.
Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov habarlady.
«Qostanaı oblysy Tótenshe jaǵdaılar departamenti Órt sóndirý jáne apatty-qutqarý jumystary qyzmeti» MM-niń synaq órt zerthanasynyń qorytyndysyna sáıkes, órttiń tehnıkalyq sebebi tokqa qosýly qalǵan sý qaınatqyshtyń qatty qyzýy saldarynan, turmystyq zattarǵa jylý energııasynyń taraýy bolǵan.
Degenmen, buǵan deıin aıtyp ótkenimdeı, balardyń ólimine alyp kelgen basty sebep - olardyń úlkenderdiń qaraýynsyz qalýy. Ata-analarǵa kúndelikti aldyn alý jumystaryn ótkizip, balalarǵa órt kezinde áreket etý erejelerin úıretý qajettigin taǵy bir eske salǵym keledi», - dep atap ótti Rýslan Imanqulov.
Eske salaıyq, 8 qazan kúni saǵat 16:15-te Arqalyq qalasynyń № 2 mamandandyrylǵan jasaǵyna Maıasov kóshesindegi kópqabatty úıdiń turǵynynan besinshi qabatta ornalasqan kórshi páterden tútin shyǵyp jatqany týraly habar kelip tústi. Saǵat 16:17-de oqıǵa ornyna jetken qutqarýshylar temir esikti arnaıy quralmen ashyp, páterge engen. Anyqtalǵandaı, 2 sharshy metr aýmaqta tósek-oryn jabdyqtary janyp jatty.
Órt sóndirýshiler tútin basqan páterden 2011 jáne 2012 jyldary týǵan eki balany alyp shyǵyp, jedel-járdem qyzmeti brıgadasyna tapsyrdy. Degenmen, balalar aýrýhanaǵa barar jolda kóz jumdy.
Turǵyn úıden 11 adam qaýipsiz jerge kóshirildi. 2008 jyly týǵan jetkinshek avtosatynyń kómegimen qutqaryldy. Tilsiz jaý saǵat 16:40-ta aýyzdyqtaldy. 
