Arqalyqta birneshe áleýmettik nysan ashyldy
QOSTANAI. QazAqparat - Qostanaı oblysynyń ákimi Arhımed Muhambetovtiń aýdandardaǵy sapary Arqalyq qalasynda jalǵasty, dep habarlaıdy QazAqparat tilshisi.
Oblys ákimi Arqalyqtaǵy birneshe áleýmettik nysandy aralady. Solardyń biri - «Januıa» medıtsınalyq ortalyǵy.
«Úsh qabatty ǵımarat barlyq talapqa saı. Zamanaýı medıtsınalyq qural-jabdyqtarmen jaraqtalǵan densaýlyq saqtaý mekemesi bir aýysymda júz adamdy qabyldaı alady. Memlekettik-jekeshelik áriptestik aıasynda júzege asqan joba quny - 100 mıllıon teńge. Budan bólek, 50 mln teńgege medıtsınalyq jabdyqtar satyp alyndy. Endi jergilikti halyqqa sapaly em-dom qabyldaý úshin oblys ortalyǵyna barýdyń qajeti joq. Atalǵan ortalyqty «Arsenal» JShS óz qarjysyna saldy», - dep málimdedi Arqalyq qalasynyń ákimi Amantaı Balǵarın.
Osy klınıkanyń ashylýy nátıjesinde kardıolog, terapevt, nevropatolog, gınekolog jáne kóz dárigeri sııaqty alty mamanǵa jumys tabyldy. Jalpy, bıyl Arqalyq óńirindegi medıtsınalyq kadr tapshylyǵy aıtarlyqtaı sheshildi. Shaharǵa ózge aımaqtardan birneshe dárigerler tartyldy.
Óńir basshysy «Aı-Álı» atty qaıta jóndeýden ótken balabaqshaǵa bas suqty. Byltyr jeke kásipker Ásem Májıtova kottedjdi mektepke deıingi bilim berý mekemesine aınaldyryp, ishin qajetti qural-jabdyqtarmen toltyrdy. Kúrdeli jóndeý jumystarynyń quny 317 mln teńgege shyqty. Ata-analar aıyna bar shyǵynnyń úshten bir bóligin ǵana tóleıdi. Ázirge munda 20 búldirshin tárbıe alyp jatyr.
Munyń syrtynda shaǵyn qalada taǵy bir balabaqsha ashyldy. 50 orynǵa shaqtalǵan «Baldyrǵan» balabaqshasy da memlekettik-jekeshelik áriptestik aıasynda halyq ıgiligine berildi. Búgin jańa nysanǵa «Alıýmınstroı» JShS «HYUNDAI» mıkroavtobýsyn syıǵa tartty.
Oblys ákimi Arhımed Muhambetov jeke kásipkerlerdiń ıgi isterine óz rızashylyǵyn bildirdi. Ol búgin Arqalyq qalasynyń ákimi Amantaı Balǵarınniń halyq aldynda esep berý jıynyna qatysady.
