Arqalyqqa mazýt tasymaldaý toqtatylady
QOSTANAI. QazAqparat - 2020 jyldan bastap Arqalyqtyń jylý-energetıkalyq ortalyǵy kómir tasymaldaı bastaıdy. Bul týraly oblys ákiminiń qatysýymen ótken apparat májilisinde belgili boldy, dep habarlaıdy QazAqparat.
Arqalyq qalasyn jylýmen qamtamasyz etý el qazynasyna qymbatqa túsedi. Sebebi, mazýttyń baǵasy jyl saıyn ósip keledi. Shaǵyn qalanyń jyldyq otyn qoryn jasaý úshin respýblıkalyq bıýdjetten 1 mıllıard tengeden astam qosymsha qarjy bólinedi. Jergilikti jylý ortalyǵyn kómirge aýystyrý máselesi 2020 jyly sheshimin tabýy tıis.
Arqalyq qalasynyń ákimi Eldar Kúzenbaevtyń sózinshe, byltyrǵy jylytý maýsymynda 20316 tonna mazýt jaǵylǵan. Qazir onyń 1800 tonnasy artyq qaldy.
«2018 jylmen salystyrǵanda 4 myń tonna mazýt únemdedik. Esesine 1200 tonna kómir satyp alyndy. Onyń ishinde Ashýtasty, Molodejnyı, Shubarkól qazandyqtaryna 960 tonna kómir jetkizildi. Kómirdiń ortasha baǵasy tonnasyna 17021 teńgege esepteldi. Byltyr Arqalyq qalasyndaǵy qýaty 2,5 MVt týrboagregatty aýystyrý jumystary bastaldy. «Arqalyq JEO qaıta jańartý» jobasy sheńberinde «GOLD EURASIA CORPORATION» JShS-men 554 mln 384 myń teńge somasyna shart jasaldy», - dedi E.Kúzenbaev.
Oblys ákimi Arhımed Muhambetov aıtqandaı, qalany mazýtpen qamtýǵa sońǵy jyly 2,5 mlrd teńge jumsalǵan. Suıyq otynnyń tonnasy 50-den 90 myń teńgege deıin ósken.
«Mundaı qarjynyń jumsalýy bıýdjetke aýyr soqqy. Mazýttyń tonnasy 120 myń teńgege deıin ósip ketýi múmkin. Sondyqtan 2020 jyly mazýt tasymaldaýdy toqtatamyz. Arqalyqty kómirmen jylytýdy bastaımyz. Joba quny 7 mlrd 600 mln teńge bolǵaly otyr. Ári qaraı osy jobanyń «Jol kartasyn» quryp, tańdalǵan merdigerlermen jumys isteımiz», - dep tapsyrdy oblys ákimi.
Buǵan deıin habarlaǵanymyzdaı, Qostanaı oblysynda 1442 shaqyrym elektr jelisin jóndeý josparlanǵan.
