Arqalyq turǵyny músin jasaýdyń sırek kezdesetin tásilimen aınalysady
ASTANA. 2 qarasha. QazAqparat - Arqalyq qalasynyń turǵyny Aıdos Esmaǵanbetov beıneleý ónerinde kezdesetin óte sırek tásildi meńgergen.
Ol - gıpperrealızm dep atalady. Bul - sılıkonnan túrli beıneler jasaýdyń bir tásili.
Gıperrealızm janrynyń ereksheligi - jasalǵan beıneniń túpnusqadan esh aıyrmashylyǵy bolmaıdy. Denedegi árbir syzyq, ájim, tipti balapan túkterge deıin qamtylady.
Áıgili Abylaı han men Elbasymyz Nursultan Nazarbaev. Aıdostyń gıperrealızm syryn meńgergennen keıingi eń alǵashqy jáne eń basty músinderi osylar. Adamnyń bet-bederiniń árbir núktesi umyt qalmaýy tıis, sondyqtan bul kóp ter tógýdi qajet etetin eńbek. Dúnıe júzinde gıperrealızmmen aınalysatyn adamdar saýsaqpen sanarlyq. Jańa janrdyń adamzatqa berer paıdasy da kóp.
Aıdos Esmaǵanbetov, gıperrealıst. Bul óte jan-jaqty nárse. Tek murajaılarǵa, kınogerlerge músin jasap qana qoımaı, medıtsınaǵa da paıdalanýǵa bolady. Mysaly, adamdarǵa jasalǵan protezdi sılıkonmen qaptap, shynaıy óń berýge múmkindik bar.
Músindi jasaý úshin, aldymen, qalyp daıyndalady. Aıdos qazir jat planetalyqtyń tolyq músinine arnalǵan qalypty jasap bitti. Al, óziniń bet pishini sılıkonnan quıylyp, daıyn tur. Endi, oǵan kóz salyp, túkterin ornatý ǵana qaldy. Qajetti materıaldardyń bárin shetelden aldyrady. Baǵasy da qymbat. Demeýshisi Aıdostyń ákesi Ákimǵalı Esmaǵanbetov.
Maqsat - Qazaqstandy damytý, kórkeıtý. Másele aqshada emes, bul - óner. Sol ónerdi halyqqa jetkizý, nasıhattaý.
Osyndaı sırek ónerdi meńgergen Aıdostyń bılik nazarynan tys qalyp qoıǵany ókinishti. Jańa janrdyń elimizge qanshalyqty paıdasy tıerin ekshep jatqan da eshkim joq. Alaıda, ónerge jan-tánimen berilgen talant tyń týyndylaryn minsiz jasap shyǵarýdy ǵana oılaıdy. Taǵy bir armany, aıryqsha tásilmen, Qazaqstanda alǵash jasalǵan gıpperrealıstik músinin Elbasynyń ózine tartý etý, dep habarlaıdy BAQ.kz.
