Arqalyq týbdıspanseriniń bas dárigerine paraqorlyǵy úshin 5,6 mln teńge aıyppul salyndy

ASTANA. QazAqparat - Arqalyq qalasynyń týberkýlezge qarsy dıspanseriniń bas dárigeri Dámesh Qosmuhambetova mekeme qarajatynyń 565 myń teńgesin qoldy qylǵany úshin jaýapqa tartyldy, dep habarlaıdy QazAqparat tilshisi.

«Qostanaı oblysynda Arqalyq aımaqtyq týberkýlezge qarsy dıspanseriniń bas dárigeri, oblystyq máslıhattyń depýtaty Dámesh Qosmuhambetova sottalyp, oǵan 5,6 mln teńge aıyppul salyndy», - dedi búgin Astanada ótken baspasóz máslıhatynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys jónindegi departamentiniń dırektory Arman Berdalın.

Ol 2013-2017 jyl aralyǵynda óziniń qyzmet babyn paıdalanyp, jalpy somasy 565 myń teńgeni jymqyryp, óz paıdasyna jaratqan.

Al Atyraý oblystyq máslıhatynyń taǵy bir depýtaty da osyndaı qylmysqa qatysty qazirgi tańda kúdikti retinde tergeýge tartylǵan.

«Atyraý oblysy boıynsha sybaılas jemqorlyqqa qarsy Ulttyq bıýro departamenti «Atyraý aqparat» JShS basshysyn ustady. Bul JShS-nyń jalǵyz quryltaıshysy - Atyraý oblysynyń ákimdigi bolǵan. Atyraý oblystyq máslıhatynyń depýtaty deldaldar arqyly adam tobymen memlekettik satyp alý kelisimin tezirek bekitý úshin merdiger uıymdardan iri kólemde para aldy degen kúdikke ilinip otyr», - deıdi Arman Berdalın.