Arqalyq mańynda boranda qalyp qoıǵan 7 adam qutqaryldy

ARQALYQ. QazAqparat – Arqalyq qalasynyń mańynda qar qursaýynda qalyp qoıǵan adamdarǵa kómek kórsetildi, dep habarlaıdy QazAqparat oblystyq TJD baspasóz qyzmetine silteme jasap.

Oqıǵa saǵat 03:00 shamasynda bolǵan. Arqalyq qalasy men Alýa selosynyń aralyǵynda «ÝAZ» avtokóligi synyp qalǵan. Boran kúsheıip, qar qalyńdap ketken soń jolaýshylar qutqarýshylarǵa habar beredi.

«Avtokólik ishinde 2 balany qosqanda 7 adam bolǵan. TJD Órt sóndirý qyzmetiniń Jedel-qutqarý jasaǵy boranda qalǵan jolaýshylardy Arqalyq qalasyna jetkizdi. Generatordyń isten shyǵýyna baılanysty avtokóliktiń buzylǵany anyqtaldy», - deıdi vedomstvonyń baspasóz hatshysy Ýálıhan Dosanov.

Oblystyq TJD turǵyndarǵa tótenshe jaǵdaı kezinde qutqarý qyzmetine («112» telefony arqyly) qońyraý shalý qajettigin eskertedi.