Arqalyq qalasy jylý berýdiń jańa túrine kóshedi
Arqalyq qalasyn ár jylý maýsymynan alyp shyǵý úshin jyl saıyn respýblıka bıýdjetinen 2 mlrd teńgeniń ústinde transfert bólinedi. Buǵan deıin qysta mazýtpen jaǵyp kelgen Arqalyqtyń jylý júıesin birtindep kómirge kóshirý maqsatynda bıýdjetten 7,4 mlrd teńge bólinip, «Arqalyq qalasynyń jylýmen jabdyqtaý júıesin 2030 jylǵa deıin qaıta jańartý» jobasy qolǵa alynǵan. Búginde jańa jylý kóziniń qurylysy qarqyndy. Bas ǵımarattyń astyńǵy qabaty tóselip, tabanyna betondy-eritindi torap salyndy. 3 bý qazandyǵy jáne sýmen jylytatyn 2 qazandyq ornatyldy.
«Qazirgi ýaqytta 2019-2020 jylǵy jylytý maýsymynyń sońynda mazýttyń qaldyǵy 6 440 tonnany quraıdy. Bıýdjette 1,39 mlrd teńge qarastyrylǵan, oǵan shamamen 18 500 myń tonna mazýt satyp alý josparlanyp otyr, ol 2020-2021 jylǵy jylytý maýsymyn ótkizý úshin jetkilikti bolady. Búginde barlyq nysandar jylytý maýsymyna tolyq daıyn. Keıin Arqalyq qalasynyń jylýmen jabdyqtaý júıesin 2030 jylǵa deıin qaıta qurý barysyn tekserdim. Jobany iske asyrýdyń jalpy somasy 7,4 mlrd teńgeni quraıdy. Jańa jylý kóziniń qurylysyn qarap shyqtym. Búgingi tańda bas ǵımarattyń qurylysy jalǵasýda, eki tsıklon men eki sý jylytý qazandyǵynyń montajy aıaqtaldy. Nysanda barlyǵy 130-dan astam adam jumys istep jatyr», dep jazdy óńir basshysy.
Energetıka jáne turǵyn úı-kommýnaldyq sharýashylyq salasy boıynsha bıyl 27 jobany júzege asyrýǵa 13 mlrd teńge bólingen. Bul jobalardyń ishindegi eń irisi de, eń mańyzdysy da – Arqalyq jylý energııasy ortalyǵyn rekonstrýktsııalaý.
«Jyl basynda josparlanǵan jumystyń 43%-y eńserilip, 3 mlrd 200 mln teńge ıgerildi. Qalanyń jańa jylý ortalyǵy 2021 jyldyń qyrkúıek aıynda paıdalanýǵa beriledi. Bıyl Arqalyq jylýmen jáne elektr qýatymen qamtamasyz etetin ortalyq mazýt otynyn paıdalanady. Qaladaǵy keıbir nysandar kómirmen jylytylady. Jylý maýsymyna jetetin mazýt jetkizip alý jaǵyn rettep aldyq», – deıdi Arqalyq qalasynyń ákimi Qaırat Ábishev.
