Arqaly aıtysker aqyn Orazaly Dosbosynov týraly kitap jaryqqa shyqty
ALMATY. Qańtardyń 16-sy. QazAqparat /Erbol Azanbek/- Belgili aıtysker aqyn, marqum Orazaly Dosbosynov týraly «Aıtystyń kórkemdik álemi (O.Dosbosynov shyǵarmalary negizinde)» atty zertteý kitap jaryq kórdi,
dep habarlaıdy QazAqparat.
Atalǵan zertteý eńbek qazirgi kezeńde kemeline kelgen ádebı tilimizdiń ilgeri basyp, damýyna aqyndyq úlesin qosqan O.Dosbosynovtyń shyǵarmashylyǵyna arnalǵan. Kitapta Orazalynyń aıtystaryndaǵy troptyń túrleri men kórkemdik tásilderdiń erekshelikteri arnaıy qarastyrylyp, burynǵy aqyndar Birjan men Sara, uly Abaı óleńderi, túrki jazba eskertkishteriniń kórkemdik sıpattarymen salystyrylyp qarastyrylǵan.
«O.Dosbosynov aıtystary negizinde alǵash ret jazylǵan bul zertteý - aıtysker aqynnyń kórkem sóz obrazdarynyń kórkemdik-tildik beınesiniń máni týraly paıymdaýlar jasaýymen qundy. Aqyn tilindegi troptardyń, kórkemdik tásilderdiń qoldanys aıasy arqyly búgingi aıtystyń kórkemdik álemin tanytady», deıdi kitaptyń alǵy sózinde fılologııa ǵylymdarynyń doktory, professor Q.Ábdezuly.
Kitap «Kıe» lıngvoeltaný ınnovatsııalyq ortalyǵynyń baspasynda 1000 dana taralymmen jaryqqa shyqqan. Kitaptyń avtory ál-Farabı atyndaǵy QazUÝ-dyń fılologııa fakýltetiniń qazaq ádebıeti kafedrasynyń izdenýshisi Áıgerim Álimjanova. Ol ál-Farabı atyndaǵy Qazaq ulttyq ýnıversıteti fılologııa fakýltetiniń túlegi.
«Bıyl Orazaly aqynnyń ómirden ótkenine 5 jyl tolady. Alǵashqy eńbegimdi arqaly aqynnyń árýaǵy razy bolsyn degen oımen jazdym», deıdi avtor.
