Arqalyqtaǵy jappaı ýlanýdyń sebebi anyqtaldy
ASTANA. KAZINFORM – Jergilikti meıramhanada ótken merekelik shara ishek ınfektsııasynyń taralýyna sebep boldy. 86 adam aýyryp, olardyń basym bóligi aýrýhanaǵa jatqyzyldy. Epıdemıologııalyq tergeý barysynda eki qyzmetkerden salmonella anyqtalyp, meıramhana ýaqytsha jabyldy.
Arqalyqta jappaı ishek ınfektsııasynyń tirkelýine baılanysty júrgizilgen epıdemıologııalyq tergeý aıaqtaldy. Eske salaıyq, 20-23 qazan aralyǵynda Arqalyq, Jangeldın aýdany jáne Qostanaı qalasynyń ınfektsııalyq bólimshelerine ishek aýrýynyń belgilerimen 86 adam júgingen bolatyn.
Naýqastardyń basym kópshiligi aýrýdy jergilikti kafede ótken merekelik sharada tamaq ishýmen baılanystyrady. Sonymen qatar 16 adam atalǵan sharaǵa qatyspaǵan, biraq sol mekemeden alynǵan taǵamdardy tutynǵan.
– 83 adam aýrýhanaǵa jatqyzylyp, olardyń 82-si saýyǵyp shyqty. Bir naýqas dárigerlerdiń baqylaýynda. Barlyq jaǵdaı boıynsha «salmonellez» dıagnozy zerthanalyq túrde rastalyp, naýqastardan Salmonella enteritidis bakterııasy anyqtaldy, – dedi Qostanaı oblysynyń sanıtarııalyq-epıdemıologııalyq baqylaý departamentinde ótken brıfıngide.
Tekserý barysynda kafe aýmaǵynda birqatar sanıtarııalyq talap óreskel buzylǵany anyqtalǵan. Osyǵan baılanysty oblystyń bas memlekettik sanıtarııalyq dárigeri mekeme qyzmetin ýaqytsha toqtatý jáne qyzmetkerlerdi jumystan shettetý týraly qaýly shyǵardy.
– Taǵam ónimderi men aýyzsýǵa júrgizilgen zerthanalyq taldaýlarda qozdyrǵysh anyqtalǵan joq. Degenmen qorshaǵan orta nysandarynan alynǵan 40 synamanyń jeteýinen ishek taıaqshasy tabyldy. Bul sanıtarııalyq jaǵdaıdyń nasharlyǵyn kórsetedi. Sonymen qatar qyzmetkerler tekserýden ótip, olardyń ekeýinen Salmonella enteritidis bakterııasy anyqtaldy, ol naýqastardan tabylǵan qozdyrǵyshpen birdeı, – delingen resmı málimdemede.
Epıdemıologterdiń aıtýynsha, ınfektsııanyń taralýyna dál osy qyzmetkerler, aýrý belgileri baıqalmaǵan tasymaldaýshylar sebep bolýy múmkin.
Qazirgi ýaqytta kafe barlyq anyqtalǵan kemshilik joıylǵanǵa deıin jabyq tur. Іs materıaldary quqyq qorǵaý organdaryna joldandy. Tekserý qorytyndysyna qaraı, ıelerine qatysty túpkilikti sheshim qabyldanady. Eger qylmystyq quram anyqtalǵan jaǵdaıda is sotqa joldanady, al ákimshilik quqyq buzýshylyq jaǵdaıynda aıyppul salynbaq.
Arqalyqtaǵy basqa qoǵamdyq tamaqtaný oryndary ázirge tekserilmeıdi. Sanıtarııalyq qyzmetter bar kúshin osy oshaqtaǵy jaǵdaıdy tolyq joıýǵa baǵyttap otyr.
Buǵan deıin Arqalyqtaǵy toıda 80-nen astam adam ýlanyp qalǵanyn jazǵanbyz.