Arqalyqtaǵy toıda 80-nen astam adam ýlanyp qaldy

ASTANA. KAZINFORM — Qostanaı oblysynda tamaqtan ýlaný saldarynan kóp adamnyń aýyrýy boıynsha tergeý jumystary júrgizilip jatyr, dep habarlaıdy Kazinform tilshisi.

Oblystyq densaýlyq saqtaý basqarmasynyń málimetinshe, 20-23 qazan aralyǵynda Arqalyq qalasynyń, Jangeldi aýdany jáne Qostanaı oblystyq aýrýhanalaryna dene qyzýynyń kóterilýine jáne jalpy álsizdikke shaǵymdanǵan birneshe naýqas túsken. Naýqastardyń barlyǵy aýrýhanaǵa jatqyzylyp, olarǵa qajetti medıtsınalyq kómek kórsetildi.

Búgingi tańda 85 adam aýrýhanaǵa jatqyzyldy, onyń ishinde Jangeldi aýdanynda — 27, Arqalyq qalasynda — 52, oblystyq aýrýhanada — 6. Zardap shekkender arasynda eresekter, balalar jáne bir júkti áıel bar.

— Naýqastardyń ómirine qaýip tónip turǵan joq, olardyń jaǵdaıy qanaǵattanarlyq dep baǵalanyp otyr. Medıtsınalyq kómek tolyq kólemde kórsetilip jatyr, — dep habarlady oblystyq densaýlyq saqtaý basqarmasynan.

Sanıtarlyq-epıdemıologııalyq baqylaý departamentiniń málimetinshe, indet bankette tamaq ishýmen baılanysty. Qazirgi ýaqytta epıdemıologııalyq tekserý júrgizilip jatyr.

— Mıkrobıologııalyq jáne bakterıologııalyq zertteýler úshin tamaq ónimderiniń úlgileri, sý jáne betki jaǵyndylar alyndy. Kafe qyzmetkerleri testileýden ótti, test nátıjeleri áli daıyn emes, — dep habarlady mamandar.

Departament málimetinshe, Qostanaı oblysynyń bas memlekettik sanıtarlyq dárigeriniń buıryǵymen onyń jumysy ýaqytsha toqtatylyp, qyzmetkerler jumystan shettetildi. Aýrý oshaǵy boıynsha QR Qylmystyq kodeksiniń 304-babynyń 1-bóligi («Sanıtarlyq erejelerdi nemese gıgıenalyq normalardy buzý») boıynsha qylmystyq is qozǵaldy. Aldyn ala zerthanalyq synaq nátıjeleri bes kún ishinde belgili bolady. Tergeý jalǵasyp jatyr.

Buǵan deıin Aqmola oblysynda ótken toıda jeti adam ýlanǵan bolatyn. Qoǵamdyq densaýlyq saqtaý qyzmetkerleri keıinirek ýlanýǵa qymyz sebep bolýy múmkin ekenin aıtty.