Arqalyqta termınal salý jáne áýejaı jolaǵyn rekonstrýktsııalaý jobasyna 20 mlrd teńge bólindi
ASTANA. KAZINFORM – Arqalyq qalasynda termınal salý jáne áýejaıdyń ushyp-qoný jolaǵyn rekonstrýktsııalaý jumystary júrgizilip jatyr.
Jobany júzege asyrýǵa 20 mıllıard teńgeden astam qarjy bólindi, onyń 5,5 mıllıard teńgesi prokýratýra organdarynyń zańsyz ıemdenilgen aktıvterin memleketke qaıtarý arqyly alynǵan qarajattan qarastyrylǵan.
Qaıtarylǵan aktıvter monoqalanyń ınfraqurylymyn jańartý jáne shalǵaı óńirler úshin turaqty áýe qatynasyn qamtamasyz etý maqsatynda jumsalýda. Bul shara qoǵam múddesi úshin qarajatty tıimdi paıdalaný úlgisi sanalady.
Jobanyń júzege asyrylýy Arqalyq qalasy, Amangeldi jáne Jangeldi aýdandary turǵyndaryna oblys ortalyǵyna jedel áýe qatynasyn uıymdastyrýǵa múmkindik beredi. Sonymen qatar bul zamanaýı aerovokzal keshenin qurý arqyly monoqala ekonomıkasynyń damýyna yqpal etedi.
Jobanyń oryndalý barysy Qostanaı oblysy prokýratýrasynyń baqylaýyna alynǵan.
Eske salsaq, budan buryn Pavlodarda jańartylyp jatqan áýejaı qashan ashylatynyn jazǵanbyz.
