Arqalyqtaǵy eki kolledjde stýdentter grantpen oqyp júrip, basqa óńirde jumys istegen
ASTANA. KAZINFORM — Arqalyq qalasynyń prokýratýrasy N.Quljanova atyndaǵy Torǵaı gýmanıtarlyq kolledji men Arqalyq polıtehnıkalyq kolledjinde bıýdjet zańnamasynyń saqtalýyna tekserý júrgizdi.
Tekserý barysynda memlekettik bilim berý tapsyrysy aıasynda bıýdjet qarajatyn maqsatsyz paıdalaný faktileri anyqtalǵan.
Atap aıtqanda, keıbir stýdentterdiń memlekettik grantpen kúndizgi bólimde bilim ala otyryp, Qazaqstannyń basqa óńirlerinde bir ýaqytta eńbek qyzmetin atqarǵany belgili boldy. Prokýratýra muny memlekettik qarjylandyrý sharttarynyń buzylýy dep baǵalady.
Qabyldanǵan prokýrorlyq den qoıý sharalarynyń nátıjesinde memlekettik bıýdjetke 3 mln teńge qaıtaryldy. Sonymen qatar zań buzýshylyqqa jol bergen bes laýazymdy tulǵa tártiptik jaýapkershilikke tartyldy.
Eske salaıyq, buǵan deıin Qyzylordada bıýdjet qarajatyn jymqyrýǵa qatysty 15 is tergelgenin jazdyq.
