Arqalyqta 35 qyzmetkerge ótemaqy tólenbegen: 11 uıymnyń basshysy jaýapqa tartyldy
ASTANA.KAZINFORM – Qostanaı oblysy Arqalyq qalasynyń prokýratýrasy qaladaǵy bilim berý uıymdarynda eńbek zańnamasynyń saqtalýyna tekserý júrgizdi.
Tekserý barysynda zeınetkerlik jasqa jetken qyzmetkerlerdiń eńbek quqyqtarynyń júıeli túrde buzylǵany anyqtaldy.
Ujymdyq sharttarda kózdelgen ótemaqylardyń tólenbeýine, sondaı-aq eńbek qatynasyn toqtatýdyń tıisti túrde rásimdelmeýine baılanysty 35 quqyq buzýshylyq faktisi anyqtaldy.
Prokýrorlyq den qoıý sharalarynyń nátıjesinde bilim berý salasynyń 35 qyzmetkerine jalpy somasy 5 mln teńgeden astam ótemaqy tólenip, osylaısha azamattardyń buzylǵan eńbek quqyǵy qalpyna keltirildi.
Sonymen qatar zańda kózdelgen jaýapkershilikke Arqalyq qalasynyń bilim berý uıymdaryna baǵynysty 11 uıymnyń basshysy tartyldy.
Qala prokýratýrasy zańdylyqty qamtamasyz etý jáne azamattardyń quqyqtaryn qorǵaý boıynsha jumysty jalǵastyryp jatqanyn habarlady.
Eńbek zańnamasynyń saqtalýy, tólemderdiń ýaqytyly jáne tolyq júrgizilýi, sondaı-aq buzýshylyqtarǵa jol bergen laýazymdy tulǵalardyń jaýapkershiligi máseleleri turaqty baqylaýda bolady.
Aıta keteıik, BQO-da 1 143 bilim berý qyzmetkeriniń eńbek quqyǵy qorǵaldy. Onyń ishinde zeınet jasyndaǵy 64 pedagogke 11 mln teńgeden astam ótemaqy tólendi.
