Arqalyq pedagogıkalyq ınstıtýty ýnıversıtet mártebesin aldy
QOSTANAI. KAZINFORM — 33 jyldyq tarıhy bar Y. Altynsarın atyndaǵy Arqalyq pedagogıkalyq ınstıtýty ýnıversıtet mártebesin aldy. Bul týraly QR Ǵylym jáne joǵary bilim mınıstrligi málim etti.
— QR Ǵylym jáne joǵary bilim mınıstrliginiń 2025 jylǵy 17 naýryzdaǵy № 118 buıryǵyna sáıkes «Y.Altynsarın atyndaǵy Arqalyq pedagogıkalyq ınstıtýty» kommertsııalyq emes aktsıonerlik qoǵamy «Ybyraı Altynsarın atyndaǵy Arqalyq pedagogıkalyq ýnıversıteti» kommertsııalyq emes aktsıonerlik qoǵamy bolyp qaıta ataldy, — delingen habarlamada.
Bul ózgeris Qazaqstannyń aımaqtaryn damytý, óńirlerdegi ekonomıkalyq teńsizdikti joıý máselelerimen tyǵyz baılanysty. Memleket basshysy Qasym-Jomart Toqaev Ulttyq quryltaıdyń tórtinshi otyrysynda aımaqtardaǵy ekonomıkanyń órkendeýine serpin beretin jańa múmkindikter ashý qajettigin atap ótken bolatyn. Osy turǵydan alǵanda, Arqalyq ınstıtýtynyń ýnıversıtet atanýyn óńirlik bilim berý men ekonomıka úshin úlken serpin dep qarastyrýǵa bolady.
Ybyraı Altynsarın atyndaǵy Arqalyq pedagogıkalyq ýnıversıteti — ekonomıkanyń barlyq salalary úshin pedagogtar men ǵylymı kadrlar daıarlaıtyn elimizdegi jetekshi pedagogıkalyq joǵary oqý oryndarynyń biri. Ýnıversıtet 1972 jyly qurylyp, bes jyldan keıin Ybyraı Altynsarın esimimen ataldy. Alǵashqyda fızıka-matematıka jáne fılologııa fakýltetteri ashyldy.
Búginde oqý ornynda «Jaratylystaný jáne aqparattandyrý», «Pedagogıka jáne fılologııa», «Tarıh jáne óner» fakýltetteri bar. Ýnıversıtet bakalavrıatty 29 bilim berý baǵdarlamasy boıynsha daıarlaıdy. Sonymen qatar oqý ornynyń materıaldyq-tehnıkalyq bazasy sońǵy zamanaýı tehnologııalarmen jabdyqtalǵan. Fızıka, hımııa jáne ınformatıka mamandyqtary boıynsha ǵylymı-tájirıbelik zerthanalar jumys isteıdi.
Buǵan deıin habarlaǵandaı, bıyl elimizde 805 pedagog-kásibı baǵdar berýshi oqytylady.