Arqalyq qalasynyń jylý jáne elektr jelilerin jańǵyrtýǵa Úkimet rezervinen 5,8 mlrd teńge bólindi

QR úkimeti baspasóz qyzmetiniń habarlaýynsha, tıisti qaýlyǵa Premer-mınıstr Oljas Bektenov qol qoıdy.

Bólingen qarajat eki baǵyt boıynsha qarastyrylǵan:

3 mlrd teńge – qalanyń elektr jelilerin rekonstrýktsııalaýǵa;

2,8 mlrd teńge – uzyndyǵy 8,3 shaqyrym jylý magıstralin jańǵyrtý jumystaryn aıaqtaýǵa.

Atalǵan jumystardy júrgizý qajettiligi Arqalyq qalasyndaǵy jylý jáne elektrmen jabdyqtaý júıeleriniń tozý deńgeıiniń joǵary bolýyna baılanysty týyndap otyr. Energetıkalyq ınfraqurylym nysandarynyń edáýir bóligi 1970 jyldardan beri jumys istep kele jatqandyqtan keshendi jańartýdy qajet etedi.

Jylýmen qamtý salasynda 2025 jyly Arqalyq qalasynyń jylý jelilerin jóndeýge 914 mln teńge baǵyttaldy. Onyń 645,5 mln teńgesi – Úkimet rezervinen, qalǵany – oblystyq bıýdjetten. Bólingen qarajat esebinen 1,6 shaqyrym jeli jańartyldy.

Jylý magıstraliniń qalǵan bóligin rekonstrýktsııalaý jumystaryn aıaqtaý jylý jelileriniń tozý deńgeıin 25%-ǵa tómendetip, jalpy qaladaǵy jylýmen jabdyqtaý júıesiniń jumys isteý senimdiligin arttyrýǵa múmkindik beredi.

Elektr jelilerin jańartý jobasy aıasynda úsh qosalqy stansany rekonstrýktsııalaý, 110, 35 jáne 10 kV kerneýli elektr berý jelilerin salýdy jáne rekonstrýktsııalaý, uzyndyǵy 37,8 shaqyrym bolatyn jelilerdegi aǵash baǵandardy temirbeton tirekterge aýystyrý josparlanǵan. Bul sharalar Qostanaı oblysynyń Arqalyq qalasynyń, Jangeldın jáne Amangeldi aýdandarynyń 58 myń turǵynyn turaqty elektrmen jabdyqtaýdy qamtamasyz etedi.

Jalpy, Úkimet qabyldap otyrǵan ınfraqurylymdy jańǵyrtý sharalary óńirdiń tirshilikti qamtamasyz etý júıeleriniń turaqtylyǵyn arttyrýǵa, halyqtyń ómir súrý sapasyn jaqsartýǵa jáne Arqalyq qalasy men oǵan irgeles aýdandardyń odan ári áleýmettik-ekonomıkalyq damýyna negiz qalyptastyrýǵa baǵyttalǵan.

Osyǵan deıin Úkimet Stepnogor jáne Kókshetaý qalalarynyń jylý jelilerin jóndeýge 3,9 mlrd teńge bólgen bolatyn.