Arqalyq qalasynda sý tasqyny saldarynan baspanasyz qalǵan 24 otbasy páter aldy

ASTANA. KAZINFORM – Ekidin aýylynda baspanasynan aıyrylǵan aýyl turǵyndary endi Arqalyqqa qonys aýdarady. Páter kiltin alǵashqylardyń biri bolyp zeınetker Saǵıra Ahmetjan aldy.

Komıssııa qorytyndysy ońtústik óńirlerdegi ótinishterdiń jalpy sanynan 73 úıdi qalpyna keltirý múmkin emes ekenin kórsetti. Otbasylarǵa Arqalyq qalasynan páterler usynyldy. Ekidin jáne Qyzyljuldyz aýyldarynan 24 otbasyna páter satyp alý úshin qurylys salýshylarmen barlyǵy 317 mln 183 myń teńgege 24 kelisimshart jasalyp, bul qarajat jaqyn arada esepshotqa túsetin bolady.

Tabıǵı apat saldarynan úıi qıraǵan Ekidin aýylynyń turǵyny zeınetker Saǵıra Ahmetjannyń otbasy qonys toıyn toılady. Jańa eki bólmeli páterdiń kiltin Arqalyq qalasynyń ákimi Ámirhan Asanov tabys etti. Áıel zardap shekkenderdiń basyna túsken jaǵdaıǵa beı-jaı qaramaǵan ákimge jáne barsha janǵa alǵysyn bildirdi. 

Eske sala ketsek, Qostanaı oblysyna «úlken sý» 25 naýryzda keldi. Arqalyq mańyndaǵy aýyldardy sý basty, Jangeldi jáne Amangeldi aýdandaryndaǵy eldi mekender de zardap shekti. Onda 28 naýryzda tótenshe jaǵdaı jarııalandy.

Úkimet qaýlysymen sý tasqyny saldarynan zardap shekken Qostanaı oblysy Arqalyq qalasynyń turǵyndaryn baspanamen qamtamasyz etý úshin Úkimettiń tótenshe rezervinen 405 mln teńge bólindi. 

Oblystyń Qarasý, Qostanaı aýdandary men Qostanaıda tótenshe jaǵdaı rejımi engizildi. Oblys ákimdigi shyǵyndy óteıtinin málimdedi. Keıinirek olar keltirilgen zalaldyń qalaı esepteletinin jáne tólemder qalaı júzege asyrylatyny túsindirildi. 

Tabıǵat apatyna qarsy kúres jumystaryna oblys belsendileri kómektesip jatyr.  

Sý basqan aýdandardyń balalary respýblıkalyq saýyqtyrý ortalyqtarynda tegin demalatyny habarlandy.