Arqalyq áýejaıyna Myrjaqyp Dýlatovtyń esimi berilmek

ASTANA. KAZINFORM — Kórnekti qoǵam qaıratkeri Myrjaqyp Dýlatovtyń esimi Arqalyq qalasynyń áýejaıyna beriletin bolady, dep habarlaıdy Kazinform agenttiginiń tilshisi.

Bul týraly qalada ótken bos jumys oryndary jármeńkesi barysynda belgili boldy.

«Ahmet Baıtursynuly atyndaǵy Qostanaı halyqaralyq áýejaıy» AQ basqarma tóraǵasynyń orynbasary Jaslan Ysqaqovtyń aıtýynsha, ol bıylǵy aqpan aıynan bastap jańadan qurylǵan Arqalyq qalalyq áýejaıy fılıalynyń dırektory qyzmetine kirisedi. Atalǵan áýejaı Myrjaqyp Dýlatovtyń esimimen atalatyn bolady.

Aıta ketý kerek, kórnekti qoǵam qaıratkeriniń esimin berý — tarıhı jadyny saqtaý jáne óńirdiń rýhanı jańǵyrýy jolyndaǵy mańyzdy qadam. Bul sheshim Alash qozǵalysy ókilderiniń qazaq memlekettiligin jáne ulttyq sanany damytýǵa qosqan úlesin ulyqtaýǵa baǵyttalǵan.

Buǵan deıin Arqalyqta áýejaıdy qalpyna keltirý jumystary josparlanyp otyrǵany belgili boldy. Áýejaıdy qaıta jańǵyrtý týraly burynǵy kólik mınıstri Marat Qarabaev turǵyndarmen kezdesý kezinde aıtqan bolatyn. Keıin áýe aılaǵyn salatyn merdiger kompanııa da anyqtaldy. 

Al Úkimet Arqalyq qalasynyń jylý jelilerin rekonstrýktsııalaý men jańǵyrtýǵa qarajat bóldi.

Osydan buryn Arqalyq áýejaıynan Astana, Almaty jáne Qostanaıǵa reıster ashylatynyn jazdyq.