Arqalyq áýejaıy qashan ashylady

ARQALYQ. KAZINFORM — Arqalyqtaǵy áýejaı qaıta qalpyna keltirilip jatyr. Qurylys jumystarynyń jalpy quny 19,5 mlrd teńge bolady dep boljanǵan. Jobany aıaqtaǵannan keıin Arqalyqtan Astana men Qostanaıǵa sondaı-aq Almaty qalalaryna qatynaıtyn áýe reısteri iske qosylmaq.

Oblystyq kólik jáne avtomobıl joldary basqarmasynyń málimetinshe, qurylys jumystaryn «StroıElıtDom» JShS merdigeri júzege asyryp jatyr. Joba aıasynda ushý-qoný jolaǵy, baǵyttaıtyn jol sondaı-aq perron jańartylmaq. Buǵan qosa jańa áýejaı termınaly salynady.

Jańa termınal saǵatyna 70 jolaýshyny qabyldaı alady. Jumystardy aıaqtaý merzimi – shilde aıynyń sońyna deıin josparlanǵan.

Birinshi kezeńde Astana–Arqalyq–Astana, Qostanaı–Arqalyq–Qostanaı jáne Almaty–Arqalyq–Almaty baǵyttary boıynsha reıster iske qosylady dep josparlanyp otyr. 

Aıta keteıik, Arqalyqtaǵy áýejaıdy qalpyna keltirý josparlary 2024 jylǵy qazan aıynda belgili bolǵan – bul týraly burynǵy kólik mınıstri Marat Qarabaev turǵyndarmen kezdesýde aıtqan edi.

Eske keteıik, buǵan deıin Zaısan men Katonqaraǵaıdaǵy jańa áýejaılar qashan ashylatynyn jazǵan edik.  Shyǵys Qazaqstan oblysynyń ákimi Nurymbet Saqtaǵanovtyń málimetinshe, Zaısandaǵy áýejaı qurylysynyń 66%-y, Katonqaraǵaıdaǵy áýejaıdyń 55%-y jasalǵan.