Arqalyq áýejaıy alǵashqy reısti qabyldaýǵa daıyndalyp jatyr
QOSTANAI.KAZINFORM – Qostanaı oblysynda Arqalyq áýejaıynyń qurylysy aıaqtalýǵa jaqyn. Bul jumys Memleket basshysynyń IV Ulttyq quryltaıda bergen tapsyrmasy aıasynda atqarylyp jatyr.
Joba Torǵaı óńirindegi áýe qarym-qatynasyn qalpyna keltirip, kólikpen qatynaý múmkindigin arttyrýǵa baǵyttalǵan. Oblystyq jolaýshylar kóligi jáne avtomobıl joldary basqarmasynyń málimetinshe, búgingi kúni termınal qurylysy men ınjenerlik jumystyń negizgi bóligi oryndaldy. Qurylysty osy jyldyń 31 shildesinde tolyǵymen aıaqtaý josparlanǵan.
Joba jańa jolaýshylar termınalyn salýmen shektelmeıdi. Sonymen qatar avarııalyq qutqarý beketiniń, arnaıy tehnıkalarǵa arnalǵan kólikjaıdyń, baqylaý- ótkizý pýnkti men dıspetcherlik munara qurylysy kózdelgen. Ushý-qoný jolaǵy, rýldeý joly jáne ushaqtar turaǵy qaıtadan jańǵyrtylyp jatyr. Áýejaı qoldanysqa berilgennen keıin saǵatyna 70 jolaýshyǵa deıin qyzmet kórsete alady, bul kórsetkish aldaǵy ýaqytta arta túspek.
Jýyrda áleýmettik jelide jergilikti blogerdiń áýe alańynyń ishki kórinisi kórsetilgen beınejazbasy keńinen tarady. Rolık qazaqstandyqtardyń joǵary baǵasyna ıe boldy.
Sonymen qatar munda turaqty áýe reısterin iske qosýǵa daıyndyq qyzý júrip jatyr. Qostanaı — Arqalyq baǵytyn sýbsıdııalaýǵa oblystyq bıýdjetten 239,3 mln teńge bólindi. Áýe tasymaldaýshysyn anyqtaý konkýrsy 2026 jyldyń 24 shildesinde jarııalandy.
Memleket qoldaýynyń arqasynda Arqalyq-Qostanaı jáne Arqalyq-Astana aralyǵyndaǵy áýe bıletteriniń baǵasy 10 myń teńge bolady. Al Arqalyq-Almaty aralyǵynda ushý quny - 25 myń teńge.
Áýejaıdyń ashylýy Qostanaı oblysynyń Arqalyq, Amangeldi jáne Jangeldi, Aqmola oblysynyń Jarqara aýdandaryndaǵy kólik qatynasynyń qoljetimdiligin arttyrmaq. Elimizdiń ózge aımaqtaryna tezirek jetý múmkindigin 80 myńnan astam turǵyn paıdalana alady.
Jobanyń júzege asýy Torǵaı óńiriniń ekonomıkasyna da oń yqpal etedi dep josparlanyp otyr.
Jergilikti bılik budan aımaqtyń ınvestıtsııalyq tartymdylyǵy joǵarylap, shaǵyn jáne orta bıznes damyp, kásiporyndardyń logıstıkalyq shyǵyny tómendeıdi, saýda, aýyl sharýashylyǵy, óńdeý ónerkásibi men qyzmet kórsetý salalarynyń aıasy keńeıedi degen senimde. Odan bólek áýejaı ashylǵan soń 136 jańa turaqty jumys orny paıda bolady.
Buǵan deıin Arqalyq áýejaıynyń qurylysyna qaıtarylǵan aktıvter esebinen 6 mlrd teńge bólingeni habarlanǵan edi.
