Arqalyq áýejaıy 22 tamyzda alǵashqy áýe reısin qabyldaıdy
ASTANA. KAZINFORM — Arqalyq qalasy áýejaıynyń qurylysy tolyq aıaqtaldy.
Búginde onda barlyq sertıfıkattaý rásimderi tolyq aıaqtalǵan. Áýejaı alǵashqy áýe reısin qarsy alýǵa saqadaı saı daıyn. Bul týraly Qostanaı oblysynyń ákimi Qumar Aqsaqalov málim etti.
— Búginde barlyq sertıfıkattaý rásimderi tolyq aıaqtaldy. 3 tamyzda áýejaıdyń avıatsııalyq qaýipsizdik qyzmetiniń № 8/26 sertıfıkaty alyndy. 18 tamyzda «Qazaeronavıgatsııa» RMK-nyń aeronavıgatsııalyq qyzmetterdi jetkizýshi retindegi № 21 sertıfıkaty alyndy. 21 tamyzda ARD serııaly №KZ01VKC00000389 aerodromnyń jaramdylyq sertıfıkaty berildi, — dep jazdy ákim áleımettik jelige.
Óńir basshysynyń málimetinshe, qazirgi ýaqytta Arqalyq áýejaıy CRJ200 úlgisindegi óńirlik jolaýshylar áýe kemelerin qabyldaýǵa jáne qyzmet kórsetýge daıyn.
Ótkizilgen konkýrs qorytyndysy boıynsha «SCAT» áýe kompanııasy» AQ áýe reısterin oryndaıtyn bolady. Erteń Arqalyq áýejaıy alǵashqy áýe reısin qabyldamaq.
Al 1 qyrkúıekten bastap kelesi baǵyttar boıynsha áýe reısteri oryndalmaq.
Ár seısenbi:
— Almaty — Arqalyq: 08:50–10:50
— Arqalyq — Qostanaı: 11:50–12:40
— Qostanaı — Arqalyq: 13:40–14:30
— Arqalyq — Astana: 15:30–16:20
— Astana — Arqalyq: 17:50–18:40
— Arqalyq — Almaty: 19:40–21:35
Ár senbi:
— Almaty — Arqalyq: 08:40–10:40
— Arqalyq — Qostanaı: 11:40–12:30
— Qostanaı — Arqalyq: 13:30–14:20
— Arqalyq — Astana: 15:15–16:05
— Astana — Arqalyq: 17:35–18:25
— Arqalyq — Almaty: 19:25–21:15
— Arqalyq áýejaıynyń qaıta iske qosylýy — Torǵaı óńiriniń kólik qoljetimdiligin arttyryp, eldi mekenderdiń áleýmettik-ekonomıkalyq damýyna jańa múmkindik beretin mańyzdy qadam, — dep jazdy ákim.
Aıta keteıik, jaqynda Arqalyq áýejaıyna IATA halyqaralyq kody resmı túrde berildi.
