Arqa tósinde altyn óndiriletin boldy
ASTANA. QazAqparat - Jezqazǵannyń irgesinde jańa ken orny ashylyp, altyn kenin shoǵyrly siltisizdendirý qurylǵylar kesheni men quramynda altyn keni bar rýdalardy óńdeýge arnalǵan óndiristik modýl iske qosyldy. Endi qaladan nebary 140 shaqyrym jerdegi Jaltyrbulaq ken ornynan qazylǵan altyn keni zamanǵa saı kúrdeli tehnologııamen shaıylyp, Shyǵys Qazaqstandaǵy altyn qorytý zaýytyna jóneltiledi. Onda Jezqazǵan keninen Dore qorytpasy alynyp, naryqqa jol tartady, - dep habarlaıdy qala ákimdiginiń baspasóz qyzmeti.
Jaltyrbulaq ken ornyndaǵy jańa qurylǵyny iske qosýǵa arnalǵan saltanatty sharaǵa Jezqazǵan qalasynyń ákimi Batyrlan Ahmetov, «Jaltyrbulaq» AQ-y fılıalynyń dırektory Sergeı Verpata, fılıal dırektorynyń orynbasary Maksım Ablın qatysty.
- Qurmetti jerlester, qadirdi jezqazǵandyqtar! Sizderdi el Táýelsizdiginiń 25 jyldyq mereıtoıymen quttyqtaımyn. Táýelsizdik jyldarynda elimizde kóptegen ınnovatsııalyq-ındýstrııalyq jobalar júzege asyp jatyr. Mereıtoı qarsańynda ótip jatqan «25 juldyzdy kún» aktsııasy aıasynda óńirimizdegi taǵy bir qýanyshty oqıǵaǵa kýá bolyp otyrmyz. Búgin jańa óndiris nysany iske qosylǵaly tur. Munda 150-den astam adamǵa jańa jumys orny ashylady, eńbekkerlerge qajetti barlyq jaǵdaı jasalyp otyr. Jańa kásiporynnyń osy ken ornynyń tóńiregindegi aýyl turǵyndaryna da bereri mol, - dedi nysannyń ashylý saltanatynda sóılegen sózinde Batyrlan Ahmetov.
Sarykeńgir aýyldyq okrýgyna qarasty aýmaqtaǵy ken ornynda qurylys jumystary byltyr bastalǵan. Altyn kenin shaıý jáne óńdeý óndirisiniń qurylysyna bas-aıaǵy 3,4 mıllıard teńge jumsalsa, onyń 2,4 mıllıard teńgesi kompanııanyń óz qarajaty kórinedi. Jobanyń tolyq qýatyna saı munda jylyna 500 myń tonnadan 1 mıllıon tonnaǵa deıin rýda óńdelmek. Kásiporynnyń aqyrǵy ónimi Dore qorytpasynyń basty satyp alýshysy - Qazaqstan Respýblıkasynyń Ulttyq banki.
Dore qorytpasynyń quramyndaǵy altynnyń úlesi ádette 70 protsentten kem bolmaıdy. Altyn ken oryndarynan alynǵan qorytpa ary qaraı tazartý zaýytyna jóneltiledi. Onda qorytpa balqytylyp tazartylǵan, synamasy qoıylǵan, álemdik standarttarǵa saı altyn quımasy túrinde satylymǵa shyǵarylady.
- Kásiporyn tolyq qýatyna saı iske qosylǵanda 150 adam jumys isteıtin bolady. Bolashaqta óndiris kólemin arttyrý oıda bar. Keler jyly naryqtaǵy suranys, ekonomıkalyq jaǵdaı oıdaǵydaı bolsa, biz osy jerde Dore qorytpasyn quıatyn jańa zaýyttyń qurylys jobasyn ázirleýdi josparlap otyrmyz. Onda biz osy jerde altyn kenin óńdeýshi tolyq tsıkldy iske qosatyn bolamyz, - deıdi «Jaltyrbulaq» AQ fılıalynyń dırektory Sergeı Verpata.
Kásiporyn basshysy qajetti óndiris quraldary men qurylǵylaryn tolyqtaı otandyq óndirýshilerden alatyndaryn, jumysshylardyń da Qaraǵandy, Shyǵys Qazaqstan oblystary men Almaty qalasynyń turǵyndary ekenin aıtady. Sondaı-aq, kompanııa ken óńdeý ornynda jumysshylarǵa arnalǵan jataqhana turǵyzyp, ony qajetti quraldarmen jabdyqtaǵan. Eki, úsh, tórt kisilik jataqhana bólmeleri qazandyq arqyly jylytylady, elektr toǵy, ınternet júıesi men telefon jelisi tartylǵan. Úlken ashana da jumys istep tur. Jaltyrbulaqtyq jumysshylar jalaqylarynyń qazir 80-250 myń teńge aralyǵynda ekenin, vahtalyq júıemen jumys isteıtindikten tsehtarda, jumysshy qalashyǵynda barlyq turmystyq, sanıtarlyq jaǵdaılardyń qarastyrylǵanyn aıtady. 
Gúlden Jandıldınova
