Arızona ýnıversıtetiniń Petropavldaǵy fılıaly alǵashqy stýdentterin qabyldaıdy

NUR-SULTAN. QazAqparat – Qazaqstan Respýblıkasynyń Ǵylym jáne joǵary bilim mınıstri Saıasat Nurbek AQSh-tyń Qazaqstan Respýblıkasyndaǵy ýaqytsha senimdi ókili Djýdı Kýomen bilim salasyndaǵy yntymaqtastyq basymdyqtaryn talqylady. Bul týraly «QazAqparat» vedomstvonyń baspasóz qyzmetine silteme jasap habarlaıdy.

Saıasat Nurbek ýnıversıtet ǵylymyn damytýǵa degen kózqarasymen bólisip, olardyń oryndalýy jańa mınıstrlik jumysynyń tabystylyǵyn aıqyndaıtyn negizgi maqsattarǵa toqtaldy – bul ǵylymdy qarjylandyrýǵa jáne ǵalym mamandyǵynyń bedelin arttyrýǵa jumsalatyn qarjynyń artýy.

«Biz jastardyń ǵylymǵa degen qyzyǵýshylyǵyn oıatyp, joǵary oqý oryndarynda tıimdi ǵylymı orta qurýymyz kerek. Bul úshin biz ozyq álemdik tájirıbeni engizýge daıynbyz», - dedi mınıstr.

Saıasat Nurbek kafedra jumys istep jatqan negizgi jobalardyń qatarynda 500 qazaqstandyq ǵalymnyń álemniń úzdik ýnıversıtetterine taǵylymdamadan ótýge jiberilýin, sondaı-aq Qazaqstanda álemdik deńgeıdegi JOO-nyń 5 fılıalynyń ashylýyn atap ótti.

Osyndaı jobalardyń biri – Petropavldaǵy Arızona ýnıversıtetiniń fılıaly qyrkúıek aıynda alǵashqy stýdentterdi qabyldaıdy. AQSh-tyń Qazaqstan Respýblıkasyndaǵy Ýaqytsha senimdi ókiliniń pikirinshe, amerıkalyq ýnıversıtet fılıalynyń ashylýy Qazaqstan men AQSh arasyndaǵy joǵary bilim jáne ǵylym salasyndaǵy yntymaqtastyqtyń jarqyn mysaly bola alady.

«Fýlbraıt baǵdarlamasynyń Qazaqstanda júzege asyrylýyn talqylaý úshin Qazaqstan men AQSh ókilderin qamtıtyn jumys tobyn qurýdy usynamyz», - dedi Djýdı Kýo.

Fýlbraıt baǵdarlamasy 1946 jyly Amerıka halqy men dúnıe júzindegi adamdar arasynda ózara túsinistikke járdemdesý úshin qurylǵan. Ol mektep muǵalimderiniń biliktiligin arttyrýǵa, stýdenttermen almasý baǵdarlamasyna, joǵary synyp oqýshylarynyń jaratylystaný, ınjenerııa jáne matematıkaǵa qyzyǵýshylyǵyn arttyrýǵa, sondaı-aq stýdent jastar arasynda áıel kóshbasshylyǵyn damytýǵa baǵyttalǵan.