Arızona shtatynda azot qyshqyly tıelgen júk kóligi aýdarylyp qaldy

ASTANA.QazAqparat - Arızona shtatynyń Týson qalasyna jaqyn mańdaǵy tasjolda azot qyshqyly tıelgen júk kóligi aýdarylyp qaldy. Jol apaty saldarynan ýly azot aǵyp ketti, dep habarlaıdy QazAqparat Reuters agenttigine silteme jasap.

Oqıǵa ornyndaǵy jol birneshe saǵatqa jabyldy. Shtattyń qoǵamdyq qaýipsizdik departamenti oqıǵadan 800 metr qashyqtyqta turatyn turǵyndardyń qaladan ketýin surady. Al jaqyn mańdaǵy turǵyndardy evakýatsııalaý bastaldy.

Ydys-aıaq nemese metall jabdyqtardy jýýǵa qoldanylatyn azot qyshqyly joǵary korrozııalyq hımııalyq zat, ol ókpe isigine, pnevmonıtke, bronhıtke, tis erozııasyna jáne kózdiń, teriniń, shyryshty qabyqtyń titirkenýine ákelýi múmkin.

Vıdeodan alynǵan kadr