Arystyq arý AQSh-tyń bilim júıesin jaqsartýǵa atsalysyp júr
ASTANA. KAZINFORM – 26 jasynda Garvard ýnıversıtetiniń grantyn jeńip alǵan Ásel Amangeldi bıyl ýnıversıtetti úzdik támamdap, bilim salasynyń magıstry atandy. Endi AQSh-taǵy bilim berý júıesin damytý qyzmetine kirispek.
District Management Group AQSh kompanııasynyń bas sarapshysy Jibek Joly arnasynyń «Búgin LIVE» baǵdarlamasynda óz joly, kásibı tájirıbesi jáne AQSh-taǵy jumysy týraly áńgimelep berdi.
— Menińshe, barlyǵy meniń bala kezimde bastaldy. Men kishkentaı ǵana Arys qalasynda týdym. Jaqynda sonda baryp, muǵalimimmen kezdesip qaıttym. Sol kisi «Sen kishkentaı kezińnen únemi alǵa umtylatynsyń. Árqashan jańa dúnıeni qalap turatynsyń», — dep aıtyp jatyr. Іshimdegi jaqsy ómirge, sapaly bilimge degen qyzyǵýshylyǵymnyń arqasynda osy dárejege jetip otyrmyn dep oılaımyn, — deıdi Ásel Amangeldi.
Stýdııa qonaǵy Amerıkadaǵy bilim júıesin taldaıtyn jetekshi kompanııadaǵy jumysyn túsindirdi.
— District Management Group — AQSh-taǵy bilim júıesin jaqsartýmen aınalysatyn úlken kompanııa. Ol jerde men bilim júıesindegi balalardyń ortasha bally, mekteptegi máseleler týraly 52 shtatpen baılanysyp, búkil aqparattardy jınaımyn. Sodan keıin ony qalaı jaqsartý kerek, neni azaıtý kerek, neni kóbeıtý keregin tolyq taldap, strategııa quramyn, — deıdi ol.
Áselge bul qyzmetti Garvardta sabaq bergen ustazy usynypty.
— Bul kompanııanyń negizin qalaýshy — meniń professorym. Garvard Bıznes ýnıversıtetinde sol kisiden «Bilim júıesindegi transformatsııa» degen sabaqtan dáris alǵan edim.Ustazymnan kútpegen jerden osy jumys týraly usynys aldym. Qýana kelistim. Árıne, ishteı qorqynysh, qobaljý boldy. Biraq aqyry sońynda jumys istep, tájirıbe jınaımyn degen sheshimge keldim. Sebebi, Amerıkada magıstratýra oqyǵan stýdentke vızasyz bir jyl jumys isteýge múmkindik beriledi. Osyndaı múmkindik berilip tursa, nege qoldanbasqa, — deıdi jas maman.
Qazaqstandyq boıjetken AQSh-taǵy iri kompanııada jumys isteý úshin 4 kezeńdik irikteýden irkilmeı ótipti.
— Professorym jumysty ózi usynǵanymen, men tolyǵymen jumysqa qabyldaý protsesinen óttim. Jumysqa turý úshin synaq tórt kezeńge sozyldy. Birinshi kezeńde jumysshyǵa úı tapsyrmasy beriledi. Maǵan bir qaladaǵy mektepterdiń sońǵy bes jyldaǵy nátıjesi berilip, sony saralap, taldaý jasaý tapsyryldy. Sol aqparattarǵa qarap otyryp, mektepti damytý strategııasyn qurdym. Ekinshi kezeńde kompanııa basshylarymen suhbat boldy. Úshinshi kezeńde keıs-stadı ótti. Onda dırektor maǵan bir naqty keısti berdi. Men ony oqyp, esep te shyǵaryp, analız de jasap, naqty sheshim usyndym. Munyń bári bir kúnniń ishinde ótti. Biraq AQSh-ta mundaı jumysqa qabyldaý protsesteri ádette 3-4 aıǵa sozylady. Al maǵan barlyq kezeńdi bir kúnge qoıǵandyqtan, olardyń maǵan degen qyzyǵýshylyǵy joǵary ekenin túsindim, — deıdi arystyq arý.
Aıta keteıik, bıyl elimizde 550 sheteldik azamat bilim alady.