Arysty shegirtke basyp jatyr
TÚRKІSTAN. KAZINFORM- Arys qalasynyń turǵyndaryn shegirtke men shirkeı ábigerge salýda.
Áleýmettik jelide Arystaǵy úı aýlalary men egistik alqaptaryn shegirtke basyp qalǵany jaıynda vıdeolar tarap jatyr. Tipti, baqshadaǵy jándikterdiń kóptiginen aıaq alyp júrý múmkin emes ekenin kórýge bolady. Al, dıqandar egistik alqaptaryndaǵy ónimderin qorǵap álek. Bul úshin ot jaǵyp, tútin tútetýde. Zalalsyzdandyratyn dáriler satyp alyp, shashyp jatqandar da bar.
Arys qalalyq aýmaqtyq ınspektsııasy usynǵan málimetke súıensek, óńirde josparlanǵan 71 300 gektar alqap tolyǵymen óńdelgen. Onyń ishinde Qojatoǵaı, Montaıtas aýyldyq okrýgindegi aýmaqtar bar.
«Bıylǵy jyldyń ereksheligi, atap aıtqanda, abıotıkalyq faktorlarǵa (temperatýra, ylǵaldyń mol túsýi jəne t.b.) tikeleı baılanysty boldy. Tabıǵı shóptiń qalyń ósýine baılanysty asa qaýipti marokko shegirtkesiniń dernəsilderi kórinbeı qaldy. Qazirgi ýaqytta aýa temperatýrasynyń ysýyna baılanysty, shópter qýrap, keı jerleri orylyp, shegirtke ushqan kezde taralýyna septigin tıgizýde. Búgingi tańda basqa aýdandardan qosymsha tehnıkalar tartylyp, jumystar toqtaýsyz kúndiz-túni atqarylýda. Oblys ortalyǵy men basqa aýdandardan kelgen mamandar da qoldan kelgenshe kómek kórsetip jatyr», - delingen Arys qalalyq aýmaqtyq ınspektsııasy usynǵan aqparatta.
Al, jelidegi jazbaǵa pikir jazýshylardyń kópshiligi jumystardyń sapasyz júrgizilip jatqanyn aıtýda. Olardyń ishinde «Shegirtkeden buryn shirkeı talap jatyr. Shegirtke adamǵa tıispeıdi ǵoı», «Arys halqy shydamdy eken, sabyr bersin. Aýylǵa jelmen kelgen shirkeı áıelimdi shaqqan edi beti isip ketti», «Esil eńbek. Egýdiń ózi qanshama jumys», «Sapasyz dári shashylǵan», «Obal-aı» sekildi basqa da jazbalar bar.
