Arystanbek Muhamedıulynyń áıeliniń úkimi qaıta qaralyp, bosap shyqty

ASTANA. KAZINFORM — Búgin Astana qalalyq sotynyń qylmystyq ister jónindegi sot alqasy apellıatsııalyq tártipte A.Muhamedıuly, onyń zaıyby G.Iskakova jáne advokat M.Týleevke qatysty qylmystyq isti qarady. 

Buǵan deıin Astana qalasynyń qylmystyq ister jónindegi mamandandyrylǵan aýdanaralyq soty 13 aqpanda úsheýin sottaǵan:

Arystanbek Muhamedıuly QK-niń asa iri mólsherde para alýǵa árekettengeni úshin (24-baptyń 3-bóligi — 367-babynyń 4-bóligi) jáne QK 58-babynyń 3 jáne 6-bóligi negizinde qylmys jıyntyǵy boıynsha aldyńǵy sot úkimimen birge 11 jylǵa bas bostandyǵynan aıyrylyp, memlekettik qyzmet atqarýǵa ómir boıyna tyıym salyndy. 

Onyń zaıyby G.Iskakova para alý boıynsha deldaldyq jasaǵany úshin (QK 368-babynyń 1-bóligi) 6 aıǵa bas bostandyǵynan aıyryldy. 

Advokaty M.Tóleev asa iri kólemde alaıaqtyq jasaǵany úshin (QK 190-babynyń 4-bóliginiń 2-tarmaǵy) 10 jylǵa advokattyq qyzmetpen aınalysý quqyǵynan aıyra otyryp, 6 jyl 8 aıǵa sottalǵan edi.

Birinshi satydaǵy sot A.Muhamedıulynyń 2022 jyldyń jeltoqsan aıynda Astana qalasynyń tergeý ızolıatorynda jatyp, áıeli G.Iskakovany deldal retinde paıdalanyp, advokaty M.Tóleev arqyly laýazymdy tulǵalarǵa qamaýdan bosatý jáne «Dıplomat» qonaq úıiniń menshik quqyǵyn saqtaý úshin asa iri kólemde para bermek bolǵanyn anyqtady.

2022 jylǵy jeltoqsannan bastap 2023 jylǵy maýsymǵa deıin elordanyń ártúrli jerlerinde G.Iskakova M.Tóleevke jalpy somasy 400 myń AQSh dollaryn jáne 27 mıllıon teńge bergen, bul aqshany advokat M.Tóleev aldaý jáne senimge qııanat jasaý arqyly ıemdengen.

Sot úkimine sottalýshylar men olardyń qorǵaýshylary shaǵym túsirdi.

Apellıatsııa soty sottalǵandardyń kinási dáleldendi degen sot qorytyndysymen kelisti. Alaıda birinshi satydaǵy sotta G.Iskakovanyń áreketi para alýda deldaldyq jasaýy tolyq aıaqtalǵan quram retinde durys saralanbaǵan.

Joǵarǵy sottyń 2015 jylǵy 27 qarashadaǵy jekelegen sybaılas jemqorlyq qylmystaryn qaraý tájirıbesi týraly № 8 normatıvtik qaýlysynyń 18-tarmaǵynyń túsindirmesi negizinde deldaldyń (G.Iskakova) áreketi aqsha tikeleı para alýshynyń, ıaǵnı laýazymdy adamnyń jeke ózine berilgende ǵana aıaqtalǵan qylmys sanalady.

Bul jaǵdaıda para alýshy bolmaǵan, óıtkeni M.Tóleev aldaý jáne senimge qııanat jasaý arqyly aqsha ıemdengen, ıaǵnı alaıaqtyq jasaǵan.

Osylaısha A.Muhamedıulynyń áreketine uqsas G.Iskakovanyń deldaldyq áreketi oǵan qatysty emes mán-jaıǵa baılanysty aıaqtalmaǵan, óıtkeni olar laýazymdy adamdarǵa aqshany para retinde berýdi kózdemegen M.Tóleevke aldanyp qalǵan.

Apellıatsııalyq saty G.Iskakovanyń áreketin aıaqtalǵan qylmystan para alý boıynsha oqtalý (QK 24-babynyń 3-bóligi, 368-babynyń 1-bóligi) sanatyna aýystyrdy, biraq buryn taǵaıyndalǵan 6 aıǵa bas bostandyǵynan aıyrý jazasyn ózgerissiz qaldyrdy.

Sonymen birge byltyr 5 shildeden bastap G.Iskakovanyń úıqamaqta ustaý merzimin eskere otyryp, úkim zańdy kúshine engenge deıin bir táýlikke bas bostandyǵynan aıyrý túrindegi eki táýlikke qamaýǵa alý esebimen G.Iskakovanyń 6 aıǵa bas bostandyǵynan aıyrý jazasy ótelgen dep esepteldi.

Osylaısha apellıatsııalyq sottyń qaýlysymen A.Muhamedıulyna jáne M.Tóleevke qatysty úkim ózgerissiz qaldy, al G.Iskakovanyń úkimi ózgerdi.

Úkim zańdy kúshine endi.

Eske sala keteıik, Ulttyq mýzeıdiń burynǵy dırektory Arystanbek Muhamedıuly 2022 jyly 28 mamyrda qamaýǵa alynǵan edi.

Antıkor mýzeı basshysyna «Altyn adamnyń álem mýzeılerine sherýi» halyqaralyq kórmesin ótkizý barysynda qarjy jymqyrdy degen aıyp taqty.

Al onyń áıeline para berýdegi — deldaldyq, advokatyna — asa iri mólsherdegi alaıaqtyq jasady degen aıyp taǵyldy. 

Degenmen Arystanbek Muhamedıuly sotta kinásin moıyndamady.

Sondaı-aq sot Arystanbek Muhamedıulyn úıqamaqqa aýystyrýdan bas tartty. 

Bıyl 13 aqpanda ol 11 jylǵa bas bostandyǵynan aıyryldy.