Arystanbek Muhamedıulynyń ashtyq jarııalaǵany ras pa

ASTANA. KAZINFORM – Keshe burynǵy Mádenıet jáne sport mınıstri Arystanbek Muhamedıulynyń áleýmettik jelidegi jeke paraqshasynda ashtyq jarııalaǵany týraly aqparat shyqty.

11 jylǵa sottalǵan eks-sheneýnikke qatysty istiń mán-jaıyn Qylmystyq-atqarý júıesi komıtetinen suraǵan edik.

- Sottalýshynyń ashtyq jarııalaýy týraly aqparat shyndyqqa janaspaıdy. Ol tamaq ishedi, bul jaǵdaı beınebaqylaý kameralarynyń jazbasymen rastalady. Sottalýshydan aryz-shaǵym túsken joq. Sonymen qatar belgilengen tártip boıynsha sottalǵan adamǵa uıaly telefon berilmeıdi, - delingen Aqmola oblystyq qylmystyq-atqarý júıesi departamentiniń habarlamasynda. 

Sondaı-aq resmı aqparatta Arystanbek Muhamedıulynyń atynan áleýmettik jelide jalǵan jazba jarııalaý faktisi boıynsha tekserý júrgiziletini aıtylǵan. 

- Jalǵan aqparat taratqany úshin jaýapkershilik qarastyrylǵan, - dep eskertildi mekemeden.

 Eske sala ketsek, burynǵy Mádenıet jáne sport mınıstri, ulttyq mýzeı dırektory Arystanbek Muhamedıuly 2022 jyly mamyrda qamaýǵa alyndy.

Antıkor mýzeı basshysyna «Altyn adamnyń álem mýzeılerine sherýi» halyqaralyq kórmesin ótkizý barysynda qarjy jymqyrdy degen aıyp taqty. 

Byltyr aqpanda Arystanbek Muhamedıuly 11 jylǵa bas bostandyǵynan aıyryldy. 

Degenmen Arystanbek Muhamedıuly sotta kinásin moıyndamady.

Ótken jyly tamyzda Apellıatsııalyq sot Arystanbek Muhamedıulyna qatysty úkimdi qaıta qarady. 

Aıta ketsek, Arystanbek Muhamedıulyna tıesili sport mektebi memleketke qaıtaryldy.