Arystanbek Muhamedıulymen baılanysy bar kompanııadan 1,3 mlrd teńgelik aktıv memleketke qaıtaryldy
ALMATY. KAZINFORM – Almaty qalasynyń prokýratýrasy burynǵy mádenıet jáne sport mınıstri Arystanbek Muhamedıulymen baılanysty kompanııanyń zańsyz ıeliginen «Qazaq entsıklopedııasy» JShS-niń 100 paıyzdyq úlesin memleket menshigine qaıtardy.
Prokýratýranyń málimetinshe, 2015 jyly seriktestiktiń quramyndaǵy jyljymaıtyn múlik aktıvteri zańsyz jekeshelendirilip, jeke zańdy tulǵanyń ıeligine ótken.
Atap aıtqanda, Áýezov aýdanynda ornalasqan, aýdany 2 108,3 sharshy metr jer ýchaskesi bar ǵımarat jeke kompanııanyń menshigine zańsyz rásimdelgen.
– Memlekettiń múliktik múddelerin qorǵaý maqsatynda Almaty qalasy Áýezov aýdanynyń prokýratýrasy jekeshelendirý shartyn jáne odan keıingi mámilelerdi jaramsyz dep taný týraly sotqa talap aryzben júgindi, – dep habarlady Almaty qalasynyń prokýratýrasy.
Іs sot satylarynda qaralyp, nátıjesinde prokýratýranyń ustanymy qoldaý tapty.
– Kassatsııalyq sottyń qaýlysymen prokýratýranyń talap aryzy tolyq kólemde qanaǵattandyryldy. Sonyń nátıjesinde quny 1,3 mlrd teńge bolatyn aktıv memleketke qaıtarylýǵa jatady, – delingen habarlamada.
Prokýratýra málimetine sáıkes, sot sheshimi «Qazaq entsıklopedııasy» JShS-niń memleketke tıesili úlesin zańsyz ıelikten shyǵarý faktilerin joıýǵa jáne memlekettiń múliktik quqyqtaryn qalpyna keltirýge múmkindik berdi.
Eske salaıyq, burynǵy Mádenıet jáne sport mınıstri, ulttyq mýzeı dırektory Arystanbek Muhamedıuly 2022 jyly mamyrda qamaýǵa alyndy.
Antıkor mýzeı basshysyna «Altyn adamnyń álem mýzeılerine sherýi» halyqaralyq kórmesin ótkizý barysynda qarjy jymqyrdy degen aıyp taqty.
Byltyr aqpanda Arystanbek Muhamedıuly 11 jylǵa bas bostandyǵynan aıyryldy.
Degenmen Arystanbek Muhamedıuly sotta kinásin moıyndamady.
Ótken jyly tamyzda Apellıatsııalyq sot Arystanbek Muhamedıulyna qatysty úkimdi qaıta qarady.
Aıta ketsek, Arystanbek Muhamedıulyna tıesili sport mektebi memleketke qaıtaryldy.
