Arystanbek Muhamedıuly soty: Almaz Nurazhan sot otyrysyna kelmedi

Burynǵy Mádenıet jáne sport mınıstri, Ulttyq mýzeı dırektory Arystanbek Muhamedıuly men onyń sybaılastaryna qatysty jańa is aıasynda sot otyrysy jalǵasyp jatyr. Búgingi otyrys Almaz Nurazhannyń kelmeýine baılanysty keıinge qaldy, dep habarlaıdy Kazinform.

Sotta eki epızod — «Dıplomat» qonaqúıin tartyp alý jáne «Altyn adam sherýi» kórmesin ótkizý kezinde bıligin asyra paıdalaný, reıderlik áreket qaralýda.

Sýdıa Kemeńger Imashev búgingi otyrysqa kelmegen Almaz Nurazhannyń túsiniktemesin oqydy.

«Densaýlyǵymnyń nasharlaýyna baılanysty sot otyrysyna qatysa almaımyn. Júrek krızimen aýrýhanaǵa kardıologqa barý qajettigi týyndady. Aýrýhanaǵa jatqyzýy da múmkin. Túsinistikpen qaraısyzdar dep úmittenemin. Anyqtama jáne túsinikteme, aýrýhanaǵa jatqyzýǵa joldama qosa beriledi», — dep jazylǵan túsiniktemede.

Osylaısha sot otyrysy 8 qańtar tańǵy 10.00-ge aýystyryldy.

Aıta keteıik, Arystanbek Muhamedıulyna Qylmystyq kodekstiń 28-baby 3-bóligi (qylmysty uıymdastyrý) jáne 189-babynyń 4-bóliginiń 2-tarmaǵy (zańsyz ıelený nemese talan-tarajǵa salý, ıaǵnı senip tapsyrylǵan bótenniń múlkin asa iri kólemde jymqyrý) boıynsha aıyp taǵylǵan.

Eks-mınıstr sondaı-aq QK 361-baby 4-bóliginiń 3-tarmaǵy (jaýapty memlekettik laýazymda otyrǵan tulǵanyń aýyr saldarǵa alyp kelgen qyzmettik ókilettigin asyra paıdalanýy), 24-bap 3-bólim (qylmysqa oqtalý), 249-bap 1-bóligi (reıderlik), 250-babynda (ókilettigin asyra paıdalaný) kózdelgen qylmysty jasady degen kúdikke ilingen.

Byltyr 20 maýsymda sot úkimimen A.Muhamedıuly 8 jylǵa bas bostandyǵynan aıyrylǵan edi. 

Sonymen qatar onyń sybaılastary da sottaldy.