«Arystan» turǵyn úı kesheninde lıftige qatysty turǵyndardan jıi shaǵym túsken
ASTANA. KAZINFORM — Atalǵan úıdegi 16 lıftiniń tek 6-aýy ǵana paıdalanýǵa berilip, esepke qoıylǵan. Qalǵan 10 lıft esepke alynbaǵan jáne paıdalanýǵa berilmegen. Bul týraly Astana qalasynyń Turǵyn úı jáne turǵyn úı ınspektsııasy basqarmasy habarlaıdy.
Basqarma taratqan aqparatqa sáıkes «Arystan» turǵyn úı kesheninde (Tólebaev k., 5) 16 lıft ornatylǵan (árbir kireberiste 2 lıft). Turǵyndar kirgen sátten bastap lıft qyzmetin «Ekolıft» JShS kompanııasy atqarǵan, alaıda turǵyndardan jıi shaǵym túsken.
— Jaýapty organdar — EQK, aýdan ákimdigi jáne turǵyn úı ınspektsııasynyń ókilderiniń tekserýleri men shyǵý jıyndary nátıjesinde 2025 jyldyń 25 qyrkúıeginen bastap «A-TEKNIK» JShS lıft qyzmetin «LIFT STROY IMPORT» JShS kompanııasyna aýystyrǵan. 16 lıftiniń tek 6-aýy ǵana paıdalanýǵa berilip, Basqarmanyń esebine qoıylǵan. Qalǵan 10 lıft esepke alynbaǵan jáne paıdalanýǵa berilmegen, — delingen habarlamada.
Vedomstvo atap ótkendeı, «A-TEKNIK» JShS kompanııasyna lıftilerge qatysty birneshe eskertý berilgen. Sonymen qatar, Astana qalasynyń mamandandyrylǵan aralyq ekonomıkalyq sotynyń sheshimi boıynsha qurylysshy «A-TEKNIK» JShS-ǵa kemshilikterdi joıý, lıftilerdi iske qosý jáne qaýipti tehnıkalyq qurylǵyny «Astana qalasynyń turǵyn úı jáne turǵyn úı ınspektsııasy basqarmasy» MM-ge esepke qoıý jóninde habarlama jiberý mindeti júktelgen. Belgili merzimde mindettemeler oryndalmaǵandyqtan, qurylysshyǵa jeke sot oryndaýshy arqyly májbúrli oryndaý tizimi joldanǵan, nátıjesinde «A-TEKNIK» JShS-ǵa qatysty atqarýshylyq is júrgizý bastaldy.
— Oqıǵa kezinde qyzmet kórsetýshi uıymy lıftini paıdalanýǵa berý úshin jóndeý-qalpyna keltirý jumysyn júrgizip otyrǵan. Lıftiniń qulaý faktisi boıynsha eńbek ınspektsııasy, polıtsııa departamenti, turǵyn úı ınspektsııasy jáne ózge de memlekettik organdardyń ókilderinen komıssııa qurylǵan. Oqıǵanyń sebepteri tergelip jatyr, — delingen habarlamada.
Eske salsaq, Astanada jóndeý kezinde lıft qulap, bir jumysshy kóz jumdy. Astana qalasynyń Qoǵamdyq densaýlyq saqtaý basqarmasy lıftiniń qulaýy kezinde zardap shekken 2 jumysshynyń jaǵdaıy týraly aıtyp berdi.