Elektr energetıkasy salasyndaǵy 13 ınvestıtsııalyq joba maquldandy
ASTANA. KAZINFORM — Qazaqstan Elektroenergetıkalyq Qaýymdastyǵynyń janyndaǵy Naryq keńesi elektr energetıkasy salasyndaǵy 13 ınvestıtsııalyq baǵdarlamaǵa oń qorytyndy berdi. Jalpy quny shamamen 2,5 trln teńgeni quraıtyn jobalar elektr jáne jylý energetıkasy nysandaryn jańǵyrtyp, eldiń generatsııalyq qýatyn arttyrýǵa baǵyttalǵan. Bul týraly Qazaqstannyń elektr energetıkalyq qaýymdastyǵy málim etti.
Qazaqstan Elektroenergetıkalyq Qaýymdastyǵynyń negizgi fýnktsııalarynyń biri — elektr energııasy men qýat naryǵynyń Keńesi fýnktsııalaryn atqarý. Qaýymdastyq 2016 jyly Qazaqstan Respýblıkasy Energetıka mınıstriniń buıryǵymen Naryq keńesi retinde aıqyndaldy.
Naryq keńesi elektr energııasy men qýat naryǵynyń jumys isteýin monıtorıngteıdi, qoldanystaǵy elektr stantsııalarynyń ınvestıtsııalyq baǵdarlamalaryn qaraıdy, elektr energııasy men qýatynyń boljamdy jeti jyldyq balansy boıynsha, sondaı-aq JEO úshin elektr qýatyna daıyndyqty qoldaý qyzmetiniń kólemin esepteý boıynsha qorytyndylar daıyndaıdy jáne energetıka salasyndaǵy normatıvtik bazany jetildirýge qatysady.
— Bıyl Naryq keńesine 14 ınvestıtsııalyq baǵdarlama tústi. Qaraý qorytyndysy boıynsha 13 jobaǵa oń qorytyndy berildi — olar Energetıka mınıstrliginde odan ári qaraýǵa jiberildi. Bir ınvestıtsııalyq baǵdarlama qaraý satysynda, — delingen habarlamada.
Jıyntyǵynda, jarııalanǵan jobalar jalpy ornatylǵan qýaty 1,7 GVt elektr qýaty jáne 900 Gkal/saǵ-tan astam jylý energııasy bar energetıkalyq obektilerdi jańǵyrtý men damytýdy kózdeıdi.
Osy jobalar boıynsha elektr qýatynyń kútiletin ósimi shamamen 1,2 GVt, al jylý qýatynyń ósimi — 400 Gkal/saǵ-tan astam bolady.
Osy jobalardy iske asyrýdaǵy jalpy ınvestıtsııalar kólemi shamamen 2,5 trln teńge dep baǵalanady.
Qýat naryǵy mehanızmi jańa generatsııa obektilerin salýǵa, sondaı-aq qoldanystaǵy elektr stantsııalaryn jańǵyrtý men ustap-kútýge ınvestıtsııalardy tartý úshin quryldy.
— Generatsııany damytý úshin aıtarlyqtaı qarjy resýrstary qajet. Energetıkalyq kompanııalardy qoljetimdi uzaq merzimdi qarjylandyrýmen qamtamasyz etý mańyzdy, óıtkeni bul ınvestıtsııalyq jobalardy iske asyrýdy jedeldetýge jáne túpkilikti tutynýshylardyń júktemesin azaıtýǵa múmkindik beredi, — dep atap ótedi Qazaqstan Elektroenergetıkalyq Qaýymdastyǵynda.
QEA elektroenergetıka naryǵynyń turaqty jumys isteý mehanızmderin damytý jáne salaǵa ınvestıtsııalardy tartý úshin jaǵdaı jasaý boıynsha jumysyn jalǵastyrady.
Aıta keteıik, elektr jáne jylý jelilerin jańǵyrtýǵa 22 mlrd teńge jumsalady.
