Arysta qus fermasy ashylady
Búgin Túrkistan oblysynyń ákimi Darhan Satybaldy Arys qalasyna issaparmen keldi. Sapar aıasynda birqatar nysandy aralap, Arys qalasynyń ınvestıtsııalyq ahýalymen tanysty, dep habarlaıdy Kazinform.
Aldymen óńir basshysy Aqdala aýylynda ornalasqan «ROYAL» qus fermasynda boldy.
Fermanyń jumysymen tanysqan oblys ákimi kásipkermen tildesip, memleketten tıisti qoldaý qarastyrylatynyn aıtty.
«Aýyldarda jańa jobalardyń ashylýy jergilikti jerdegi jumyssyzdyqty boldyrmaýǵa septigin tıgizedi. Arystaǵy aýyl sharýashylyǵy salasyndaǵy tyń jobalardyń jergilikti kásipkerler tarapynan júzege asyrylýy, otandyq ónim óndirip qana qoımaı, ony eksportqa shyǵarýǵa jasalyp otyrǵan nyq qadam. Qazir „Aýyl amanaty“ jobasy júzege asyrylyp jatyr. Biraq basym bóligi mal sharýashylyǵyn tańdady. Basqa da bıznes baǵyttaryn úırenýge bet burý kerek. Kásiporyndar ashqan jón. Ár otbasy ózin ózi asyraı alatyndaı jaǵdaıǵa jetkizý mańyzdy. Osy baǵytta jumystar kúsheıedi», — dedi óńir basshysy.
«ROYAL qus» fermasy jumyrtqa baǵytyndaǵy 10 myń qus ósirýdi qolǵa almaq.
Ferma iske qosylǵannan keıin táýligine 7000 myń dana jumyrtqa óndirýge qaýqarly. Jergilikti 10 adam turaqty jumyspen qamtylady.
Jobanyń jalpy quny — 310 mln teńge.
Negizgi qurylys jumystary aıaqtalǵan fermaǵa kásipker óz qarjysy esebinen 110 mln teńgege jumsaǵan.
Importtyq azyq-túlik taýarlaryn yǵystyryp, otandyq ónim mólsherin kóbeıtýdi maqsat etken ferma qalǵan qarajatty memlekettik qoldaý arqyly jeńildetilgen nesıe alýǵa nıetti.
Jobany iske asyrý kezinde eń zamanaýı jabdyqtar men álemge tanymal óndirýshilerdiń jańa tehnologııalary qoldanylady.
Aıta keteıik, qus fermasynyń janynda 70 bas jylqyǵa arnalǵan bordaqylaý alańy da iske qosylǵan.
