Arysta áskerı bólimde úsh adam kóz jumdy, taǵy ekeýi aýyr jaǵdaıda jatyr

ASTANA. KAZINFORM — Búgin, 5 shildede Arys qalasyndaǵy áskerı bólim aýmaǵynda káriz júıesine qyzmet kórsetý men tazalaý kezinde káriz gazymen ýlaný saldarynan úsh adam qaza tapty. Bul jaıynda Qorǵanys mınıstrliginen habarlandy. 

Onyń ishinde eki azamattyq tulǵa jáne bir kelisimshart boıynsha áskerı qyzmetshi bar. 

Oqıǵa jumys barysynda abaısyzda qudyqqa qulap ketken Shymkent aýdandyq paıdalaný bóliminiń jumysshysyn qutqarý kezinde boldy. 

Oǵan kómekke kelgen taǵy eki jumysshy men kelisimshart boıynsha eki áskerı qyzmetshi de jaǵdaıynyń nasharlaýyna baılanysty joǵaryǵa kóterilip shyǵa almady. 

Nátıjesinde úsh adam sol jerde qaza tapty.

Taǵy bir jumysshy men áskerı qyzmetshi Arys qalasynyń aýrýhanasyna jetkizildi.

Qazirgi tańda olardyń jaǵdaıy turaqty aýyr dep baǵalanyp otyr.

Qorǵanys mınıstrliginiń basshylyǵy men Qarýly kúshterdiń jeke quramy qaza tapqandardyń týystary men jaqyndaryna qaıǵysyna ortaqtasyp kóńil aıtady. 

Olardyń otbasyna búkil qajetti kómek kórsetiledi. 

Atalǵan fakti negizinde QR ІІM ÁTB Shymkent bólimi QR QK 156-baby 4-bóligi boıynsha sotqa deıingi tergeý bastady (eńbekti qorǵaý erejelerin buzý).