Arysta asyl tuqymdy qoshqarlardyń kórme-saıysy ótti
TÚRKІSTAN. KAZINFORM - Arys qalasynda tuqymy sırek kezdesetin qoshqarlardyń kórme saıysy uıymdastyryldy. Qalalyq ortalyq stadıonda ótken sharaǵa qoı baǵyp, qoshqar baptaǵan sharýalar 200-den asa qoshqar ákelip, ózara baq synasty.
Kórmeni arystyq kásipker Almaz Shúkirbekov pen qalanyń belsendi sharýa qojalyqtary uıymdastyrdy. Sharanyń ashylý saltanatyna qala ákimi Gúljan Qurmanbekova qatysyp, kórmeniń mańyzdylyǵyna toqtaldy. Igi isti uıymdastyrýshylar men mal basyn asyldandyrý baǵytynda eńbek etip jatqan sharýalarǵa sáttilik tiledi.
«Elimizdiń azyq-túlik qaýipsizdigin qamtamasyz etý, aýyl halqynyń áleýmettik-turmystyq jaǵdaıyn jaqsartý men mal sharýashylyǵynyń eksporttyq áleýetin arttyrýda dástúrli sala – qoı sharýashylyǵyn órkendetýdiń mańyzy erekshe. Endeshe, sharýalarymyzdyń isi berekeli bolsyn», - dedi Gúljan Qurmanbekova.
Kórmege alystan arnaıy kelgen qurmetti qonaqtar, asyltuqymdy qoı ósirýshi shopandar men iri sharýaqojalyqtar qatysty. Quıryqty qylshyq júndi, qısary jáne arashan qoı tuqymdary kórmege qoıyldy.
Saıystyń erejesi boıynsha qazylar alqasy qoılardyń salmaǵy men boıyna jáne ekstererine qaraı baǵa berdi.
Qorytyndysynda Berik Sultan esimdi qatysýshynyń 144 kelilik «Músin» qoshqary eń joǵarǵy salmaq kórsetti. Belgili arystyq qoıbegi Aqylbek Áljannyń «Gektar» atty qoshqary 105,5 sm boıdy kórsetip, bıiktik boıynsha chempıon atandy. Al absolıýtti salmaqta Baqbergen Áljanovtyń «Kýba» atty qoshqary eksterer boıynsha úzdik boldy.
Shymkentten kelgen Baqtııar Balajannyń «Turan» qoshqary 195 kelimen jeńimpaz bolyp tanyldy. Qazylar alqasynyń sheshimimen salmaǵy, boıy jáne kelbeti eskerilip, úzdik qoshqar ıelerine alǵys hattar men chempıondyq belbeý jáne kýboktar tabystaldy.
