Arys turǵyny qyzyna qatysty dabyl qaqty: polıtsııa ne anyqtady
ASTANA. KAZINFORM — Túrkistan oblysynyń Arys qalasynyń turǵyny áleýmettik jelide ákesimen birge turatyn kishkentaı qyzyna zorlyq-zombylyq kórsetilýi múmkin ekenin málimdedi. Áıeldiń aıtýynsha, balasynyń denesinen kúmán týdyrǵan izderdi baıqaǵan. Sondaı-aq ol 2021 jyly qaıtys bolǵan tuńǵysh balasynyń ólimine qatysty da másele kóterdi. Polıtsııa áıeldiń aryzyn tekserip, nátıjesin jarııalady.
Áıel óz oqıǵasyn Threads áleýmettik jelisinde jarııalaǵan. Aýdıojazbada ol 2021 jyldan bastalǵan oqıǵalardy baıandaǵan. Sol kezde júktiliginiń segizinshi aıynda bolǵan áıel Arys qalasynyń turǵynymen tanysqan. Onyń aıtýynsha, er adam dúnıege keletin balany óz qyzyndaı qabyldaýǵa ýáde bergen. Alaıda qyzdyń bıologııalyq ákesi basqa adam bolǵan.
Áıel Arys qalasyndaǵy perzenthanada bosanǵan. Onyń sózinshe, náreste alǵashqy úsh kúnde ózin jaqsy sezingen. Alaıda bosanǵannan birneshe kún ótken soń dáriger qyzynyń qaıtys bolǵanyn habarlaǵan. Anasynyń aıtýynsha, balasynyń denesinen kóptegen ıne shanshyǵandaı izderdi baıqaǵan. Osy jaǵdaıdan keıin ol balanyń óliminiń mán-jaıyn anyqtaý úshin quqyq qorǵaý organdaryna júgingen.
Arada eki jyl ótken soń áıeldiń tanysqan er adamnan ekinshi qyzy dúnıege kelgen. Al 2026 jyly densaýlyǵyna baılanysty qyzyn ákesiniń qaraýyna bergen. Keıin onyń aıtýynsha, balasymen kezdesýi qıyndaı túsken.
— 2026 jyly qanazdyqqa baılanysty ortaq qyzymyzdy bıologııalyq ákesiniń qaraýyna berdim. Sodan keıin ol balany maǵan kórsetpeı qoıdy. Qyzymnyń jaǵdaıy jaqsy ekenine kóz jetkizý úshin polıtsııa arqyly baryp júrdim. Keıin balanyń denesindegi kóptegen tyrtyqty vıdeoǵa túsirip aldym. Barlyǵyn sýretke túsirdim. Qamqorshylyq organdarynan MRT (magnıttik-rezonanstyq tomografııa) jasatýdy talap ettim, biraq olar ÝDZ ǵana jasady. Balabaqshaǵa barǵan saıyn qyzymnyń denesinen jańa tyrtyqtardy kóretinmin. Ótinemin, balamdy qorǵap, maǵan qaıtaryńyzdar, — dedi áıel aýdıojazbada.
Áıel jarııalanymyna qyzynyń denesindegi izder beınelengen fotosýretterdi de tirkegen. Onyń kúdiginshe, balaǵa zańsyz medıtsınalyq aralasýlar jasalýy, sonyń ishinde súıek kemiginen synama alynýy múmkin. Ol bul kúdigin 2021 jyly tuńǵysh qyzynyń qaıtys bolýymen baılanystyryp, kishi qyzynyń densaýlyǵyn tekserýdi suraǵan.
Túrkistan oblystyq polıtsııa departamentiniń Kazinform agenttigine habarlaýynsha, áıeldiń aryzyn Arys qalasynyń polıtsııa qyzmetkerleri ýákiletti organdar ókilderimen birlesip teksergen. Tekserý nátıjesinde balanyń ómiri men densaýlyǵyna qaýip tónip turǵany týraly aqparat rastalmaǵan.
— Aǵymdaǵy jyldyń qyrkúıek aıynda anasy qyzyn jeke zattarymen birge ákesiniń qaraýyna bergeni anyqtaldy. Sodan beri bala ákesimen birge turady. Qyzdy mamandar tekserdi. Densaýlyq jaǵdaıy qanaǵattanarlyq, denesinde kózge kórinetin jaraqattar anyqtalǵan joq. Bala balabaqshaǵa barady, — dep habarlady Túrkistan oblystyq Polıtsııa departamenti.
Polıtsııa málimetinshe, saýalnama júrgizilgen kórshiler áıeldiń tirkelgen mekenjaıynda jıi bolmaıtynyn jáne aınalasyndaǵylarmen janjaldasatynyn aıtqan.
— Kámeletke tolmaǵan balanyń qaýipsizdigi men quqyqtaryn qorǵaý máselesi polıtsııanyń erekshe baqylaýynda. Balanyń turýy men tárbıelenýine tıisti jaǵdaı jasaý maqsatynda ýákiletti organdarmen birlesip qajetti sharalar qabyldanyp jatyr. Jınalǵan materıaldardy kámeletke tolmaǵandardyń isteri jónindegi komıssııa otyrysynda qaraý usynyldy, — dep tolyqtyrdy quqyq qorǵaý organdary.
Aıta keteıik, sońǵy eki jylda Qazaqstanda balalardyń quqyqtaryn qorǵaý júıesin kúsheıtýge baǵyttalǵan 11 zań men baǵdarlama qabyldandy. Sonymen qatar 158 naqty sharany qamtıtyn «Qazaqstan balalary» baǵdarlamasy iske qosyldy.
