Arys, Shymkent, Taraz jáne Lýgovoıdaǵy áskerı ınfraqurylym jańartylady
ASTANA. KAZINFORM - Qorǵanys mınıstriniń tyl jáne áskerı ınfraqurylym jónindegi orynbasary general-maıor Almaz Jumakeevtiń basshylyǵymen jumys toby Arys, Shymkent, Taraz jáne Lýgovoı garnızondaryndaǵy áskerı nysandardyń jaı-kúıin, áskerı bólimderdiń materıaldyq-tehnıkalyq qamtamasyz etilýin jáne áskerı qyzmetshilerdiń qyzmet ótkerý jaǵdaıyn tekserdi.
QR Qorǵanys mınıstrligi bapasóz qyzmetiniń habarlaýynsha, keshendi baǵalaý polıgondar men áskerı qalashyqtardy ustaý jáne damytý, kazarma qorynyń jaı-kúıi, sondaı-aq jeke quramnyń turmystyq jaǵdaıy, tamaqtaný sapasy, medıtsınalyq jáne kıim-keshekpen qamtamasyz etilýi sııaqty keń aýqymdy máselelerdi qamtydy.
Shymkent garnızonynda kúrdeli jóndeýdi nemese buzýdy qajet etetin apatty ǵımarattardyń tnıkalyq jaǵdaıy baǵalandy. Ár nysan boıynsha naqty sharalar aıqyndalyp, olardy oryndaý merzimderi belgilendi.
Taraz garnızonynda Qorǵanys mınıstriniń orynbasary kúrdeli jóndeýden keıin ashylǵan monsha-kir jýý kesheniniń ashylý rásimine qatysty. Budan keıin polıgondar, áskerı ınfraqurylym nysandary men kazarmalardy aralap, atty ásker bólimshelerindegi qyzmettik jylqylardy ustaý jáne kútip-baptaý jumystaryn tekserdi.
91678 áskerı bóliminiń aýmaǵynda ol park sharýashylyǵynyń, mádenı-demalys ortalyǵy men sport zalynyń jaı-kúıimen tanysty. Oqý-jattyǵý bazasyn damytýǵa jáne áskerı qyzmetshilerdi daıarlaýǵa qajetti jaǵdaı jasaýǵa jiti aýdaryldy.
Sonymen qatar general-maıor A. Jumakeev jańa modýldik ǵımarattardyń qurylysy men áskerı nysandardaǵy kúrdeli jóndeý jumystarynyń sapasyn tekserdi. Garnızon basshylyǵymen kazarma qoryn odan ári keńeıtý perspektıvalary talqylandy.
«Qarataý» polıgonyndaǵy qurylys jumystarymen tanysý barysynda Qorǵanys mınıstriniń orynbasary onyń ınfraqurylymyn damytýdyń mańyzdylyǵyn atap ótti. Polıgondy jańǵyrtý áskerı qyzmetshilerdiń jaýyngerlik, taktıkalyq jáne arnaıy daıarlyǵy boıynsha praktıkalyq sabaqtar ótkizýge qajetti jaǵdaı jasaýǵa múmkindik beredi. Bul oqý múmkindikterin keńeıtip, «Aısha bıbi» polıgonyna túsetin júktemeni azaıtady.
Arys garnızonynda Qorǵanys mınıstriniń orynbasary búrkemeleý torlary men gabıondar óndiretin tsehtardyń jumysymen tanysty. Garnızon basshylyǵy turǵyn úı qorynyń jaı-kúıine, sondaı-aq qyzmettik kabınetter, oqý synyptary, qoımalar men zerthanalarǵa arnalǵan alańdardy keńeıtý qajettigine qatysty máselelerdi kóterdi.
Lýgovoı garnızonynda general-maıor Almaz Jumakeev qazandyqtyń jumysyn qamtamasyz etip, onyń tıisti jaǵdaıda ustalýyna jaýapty aýdandyq paıdalaný bóliminiń mamandarynyń jumysyn joǵary baǵalady. Ol qyzmetkerlerge adal eńbegi men jabdyqtardy úlgili jaǵdaıda ustaǵany úshin jeke alǵysyn bildirdi. Sonyń arqasynda qazandyq júıesi 26 jyldan beri úzdiksiz jumys istep keledi.
Áskerı bólimderge barǵan kezde jumys toby materıaldyq quraldar, kıim-keshek múlki jáne janar-jaǵarmaı materıaldarynyń esebin júrgizýge jaýapty qyzmet mamandaryna da ádistemelik kómek kórsetti. Bólingen qarajatty utymdy paıdalaný, sondaı-aq qajet bolǵan jaǵdaıda olardy basym baǵyttarǵa qaıta bólý qajettigine nazar aýdaryldy.
Jumys saparynyń qorytyndysy boıynsha Qorǵanys mınıstriniń orynbasary áskerı nysandardy salý jáne kúrdeli jóndeý jónindegi Jol kartasynda kózdelgen is-sharalardy ýaqtyly iske asyrý boıynsha naqty tapsyrmalar berdi.
-Budan bólek áskerı qyzmetshilerdiń materıaldyq-turmystyq jaǵdaılaryn jaqsartýǵa, tamaqtanýdy uıymdastyrýǵa jáne medıtsınalyq qamtamasyz etýge erekshe nazar aýdaryldy,-delingen habarlamada.
Osyǵan deıin Prezıdent Qorǵanys mınıstrine Qarýly kúshterdiń jaýyngerlik daıarlyǵyn jetildirýdi tapsyrǵan bolatyn.
