Áriptesterin úıine qonaqqa shaqyrǵan aqtóbeliktiń isi sotqa jiberildi
AQTÓBE. QazAqparat – Karantınge qaramastan úıine qonaq shaqyrǵan 30 jastaǵy aqtóbelik ákimshilik jaýapqa tartylady, dep habarlaıdy QazAqparat tilshisi.
Aqtóbe oblysy boıynsha tótenshe jaǵdaı rejımin buzǵan 267 fakti tirkeldi. Ákimshilik quqyqbuzýshylyq týraly kodekstiń «TJ rejımin buzý» baby boıynsha 55 adam qamalyp, 107 turǵyn aıyppul tóledi. Al Kodekstiń «TJ jaǵdaıynda quqyq tártibin buzýǵa ıtermeleıtin is-áreketter» baby boıynsha 6 adam qamaldy.
«Blokposttardy zańsyz aınalyp ótpek bolǵan 4 adam qamaldy. Ekeýine aıyppul salynyp, 9 materıal sotqa jiberildi. Sonymen birge polıtsııa qyzmetkerleri volonterlermen birge kún saıyn qalanyń kósheleri men aýlalaryn baqylap júr. 7 sáýir kúni 30 jastaǵy aqtóbelik óz úıinde áriptesterin jınap qonaq qylǵan. Polıtsııa qyzmetkerleri ÁQBtK-niń 476-baby 6-tarmaǵy boıynsha ákimshilik hattama toltyrdy. Materıal Aqtóbe qalasynyń mamandandyrylǵan ákimshilik sotyna jiberildi», - dedi oblystyq PD baspasóz qyzmetiniń jetekshisi Erbolat Sarqulov.
