Áriptesteri mektepte asylyp qalǵan muǵalimniń qandaı jan bolǵanyn aıtty
ShYMKENT. QazAqparat - Shymkenttegi mektepterdiń birinde asylyp qalǵan muǵalim týraly jańa derekter paıda boldy. 27 jastaǵy pedagog týraly áriptesteri aıtyp berdi, dep habarlaıdy QazAqparat tilshisi.
Mektep ujymynyń aıtýynsha, marqum bolǵan muǵalimniń denesin sol kúni oqýshylar men áriptesteri taýyp alypty. Ol jylý qubyryna jip baılap, býynyp qalǵan. Muǵalimder artynsha quzyrly organǵa habar bergen. Ókinishke qaraı, jedel járdem jetkenshe muǵalim jan tásilim etken.
Ázirge muǵalim óz-ózine qol jumsady ma, joq pa, ol jaǵy ázirge belgisiz. Sondaı-aq, jas muǵalimniń mundaı qadamǵa ne sebepti barǵany da jumbaq kúıinde qalyp tur. Ózge ustazdar bolsa onyń óte jaıdary, aqkóńil ári qamqor jan bolǵanyn aıtady. 2014 jyldan beri mektepte pedagog-uıymdastyrýshy qyzmetin atqarǵan. ol tipti úılenip, januıaly da bolmapty.
«Ol óte aqkóńil, jaıdary, ylǵı kúlip júretin jan edi. Árdaıym jyly qabaq tanytyp, jaǵdaıymyzdy surap turatyn. Onyń qasyna barsaq bir qýat alatyn edik. Sondyqtan onyń mundaı jaǵdaıǵa tap bolǵany bizge óte qaıǵyly, ókinishti»,- deıdi osy mekteptiń hor jetekshisi Roza Amrına.
Ujymdastarynyń sózinshe, marqumnyń týystary uldarynyń mezgilsiz qazasyna baılanysty «mektep ákimshiligine eshqandaı kiná artpaımyz» dep tilhat beripti. Qazir qaıǵyly jaǵdaıǵa baılanysty óńirdiń tártip saqshylary tergep-tekserý amaldaryn bastap ketti.
«Qazirgi tańda Qarataý aýdandyq polıtsııa bóliminiń qyzmetkerlerimen bolǵan jáıtqa baılanysty tekserý jumystary júrgizilip jatyr. Naqty sheshim sol tekserý jumystarynyń qorytyndysy boıynsha qabyldanady», - deıdi Oblystyq ІІD baspasóz qyzmetiniń jetekshisi Saltanat Qarakózova.
