Áriptesteri belgili qalamger Smaǵul Raxymbekti eske aldy
Smaǵul Rahymbek 1952 jyly Aqmola oblysy Qorǵaljyn aýdanynda dúnıege kelgen. Eńbek jolyn aýdandyq «Shamshyraq» gazetinen bastaǵan ol uzaq jyldar boıy Aqmola oblystyq teleradıo kompanııasynda aǵa redaktor, bas redaktor laýazymdarynda boldy. Keıin QR Prezıdentiniń teleradıokesheninde bas redaktor qyzmetin atqarǵan. Saıası-qoǵamdyq isterge de belsendi atsalysty. Arqa óńirinde memlekettik tildiń, ulttyq salt-dástúrdiń damýyna mol úles qosty. Qalamger shyǵarmashylyq jolda úlken tabystarǵa qol jetkizdi. Óleńderi men prozalyq týyndylary jeke kitap bolyp shyqty.
L. Gýmılev atyndaǵy Eýrazııa ulttyq ýnıversıtetiniń Aqseleý Seıdimbek zalynda ótken basqosýdy ǵalym-jýrnalıst Muratbek Toqtaǵazın júrgizdi. Jýrnalıstıka salasynyń ardagerleri Janbolat Aýpbaev, Bádýan Imashuly, Kenje Jumaǵulov, Qazına Nurqanova, Kúlásh Moldahmetovalar sóz alyp, Smaǵul Rahymbektiń azamattyq asyl qasıetteri, áriptesteri arasynda syıly bolǵandyǵy jóninde estelikter aıtyp berdi.
Mektepte birge oqyǵan synyptasy Qaly Mantıkov jastyq shaqtaǵy qyzyqty oqıǵalardy baıandaı kelip, zamandastary aqyndy qadir tutatynyn jetkizdi.
Ardager ustaz Ospan qajy Súleımenov, qoǵam qaıratkeri Baýyrjan Jańabekuly, jýrnalıst Bazargúl Úmbetova, ýnıversıtet oqytýshysy, atalǵan fakýltet dekanynyń orynbasary Gúljaýhar Bolatova, kitaphanashy Janar Bekaıdarqyzy, jas ǵalym Amangeldi Shúrentaevtar da artynda máńgilik murasyn qaldyrǵan qalamger týraly oılaryn ortaǵa saldy. Aqyn Aıbatyr Seıtaq «Smaǵul aǵa rýhymen syrlasý» atty óleńin oqydy. Jerlesteri atynan sóz alǵan muǵalim Baıan Sısembaeva balalyq shaǵynda kórshi turǵanyn, ózi de aqyn bolsam dep soǵan eliktep óskenin aıtty.
«60 jasyn ótkizgen kezde Smaǵul aǵanyń ózi kelip qatysqan bolatyn. Sonda ony kórip, sózin tyńdadym. Ol ómirden ozǵan soń, ómiri men jyrlaryn nasıhattaý maqsatynda biraz ister qolǵa alyndy. Atap aıtqanda, Janteke aýylyndaǵy aqyn oqyǵan mektepte 2019 jyly Smaǵul Rahymbektiń kabıneti ashyldy. Men sol kabınettiń jetekshisimin. Jyl saıyn shyǵarmashylyǵyna arnalǵan kesh ótkizip turamyz. Mektep oqýshylary aqynnyń óleńderin jatqa oqıdy. Biz qalamgerdiń ómirbaıanymen tanystyramyz, estelikter aıtamyz», - dedi Qorǵaljyn aýdanynan arnaıy kelgen ustaz Sholpan Eltaıqyzy.
Aqyn S. Rahymbektiń birneshe óleńine án jazylǵan. Sonyń ishinde Ásel Іrgebaevanyń oryndaýyndaǵy Tolqyn Nurtasqyzynyń «Shaǵala-arman» ánin tyńdaýshylar árkez jyly qabyl alady. Kompozıtor Marat Álimjanov «Táýelsizdik – tuǵyrym», «Arman ǵumyr» atty jyrlaryna án shyǵarǵan. Sondaı-aq, qalamgerdiń «Astananyń aýasy», «Asyl jarym» óleńderiniń de mýzykasy bar.
Osy keshte stýdentter aqynnyń birneshe óleńin jatqa oqydy.
Aqynnyń jary Álııa Eslıamqyzy Rahymbekova qalamgerdiń azamattyq qadir-qasıeti týraly syr shertip, óz estelikterin aıtqan áriptesteri men zamandastaryna jáne uıymdastyrýshylarǵa otbasy atynan úlken rızashylyǵyn bildirdi.
