Áriptesine qol kótergen Sarysý aýdandyq polıtsııa bóliminiń basshysy jumystan bosatyldy
TARAZ. QazAqparat – Jambyl oblysy Sarysý aýdandyq polıtsııa bóliminiń bastyǵy Qýanysh Bekqojaev qyzmettik etıkany buzǵany úshin qyzmetinen bosatyldy, dep habarlaıdy QazAqparat tilshisi.
Aıta keteıik, buǵan deıin instagram -da polıtsııa qyzmetkeri áriptesine qol kótergen vıdeosy paıda bolǵan edi.
Kóp uzamaı ol Jambyl oblysy Sarysý aýdandyq polıtsııa bóliminiń bastyǵy Qýanysh Bekqojaev ekendigi belgili bolǵan.
Atalǵan vıdeoǵa qatysty Jambyl oblystyq polıtsııa departamentiniń baspasóz qyzmeti túsinikteme berdi.
«Áleýmettik jelilerge monıtorıng júrgizý barysynda polıtsııa qyzmetkerleriniń tártiptik jarǵydan tys qarym-qatynas deregin bildiretin beıne jarııalanym anyqtaldy. Bul oqıǵa 2020 jylǵy 4 maýsymda Jambyl oblysynyń Sarysý aýdandyq polıtsııa bóliminde oryn alǵan.
Atalǵan derek boıynsha Ózindik qaýipsizdik basqarmasymen qyzmettik tekserý júrgizildi. Qyzmettik etıkany óreskel buzǵany úshin Sarysý aýdany polıtsııa bóliminiń bastyǵy Qýanysh Bekhojaev qyzmetinen bosatyldy»,-delingen vedomstvo habarlamasynda.
