Áriptesin óltirgen polıtseıdiń soty keıinge qaldyryldy
ALMATY. QazAqparat - Almaty qalasynyń Qylmystyq ister boıynsha aýdanaralyq mamandandyrylǵan sotynda óz áriptesin atyp óltirgen polıtseıdiń basty sot talqylaýy bastaldy, dep habarlaıdy QazAqparat tilshisi sot zalynan.
Sot aldynda Jergilikti polıtsııa qyzmetiniń burynǵy ınspektory Azamat Berıstemov jaýap berýi tıis.
Qaza tapqan Sábıt Beglanuly ınspektor Azamat Berıstemovtiń qaryndasyna úılengen kúıeý balasy, onyń artynda 3 bala qalǵan.
Alaıda sot otyrysy búgin ótkizilmedi. Sebebi, sottalýshy aýyryp qalǵandyqtan, aıdaýyl qyzmeti ony sotqa alyp kele almady.
Sýdıa Erlan Bolatov er adamnyń densaýlyǵy týraly anyqtama ákelýin talap etti.
«Eger ol kelesi joly da kelmese, anyqtama ákelsin. Bolashaqta sot protsesinen bas tartatyn bolsa, Qylmystyq protsessýaldyq kodeks boıynsha sot protsesin onyń qatysýynsyz ótkize alamyz. Qazir bastaı almaımyz. Sot keıinge qaldyryldy», - dedi Erlan Bolatov.
Eske salaıyq, 2018 jyly qyrkúıek aıynyń sońyna qaraı Almatyda Jergilikti polıtsııa ınspektory Azamat Berıstemov óziniń áriptesi Sábıt Beglanulyn atyp tastaǵan bolatyn. Jaraqat alǵan Sábıt Beglanuly sol kúni, túngi saǵat 22.00-de aýrýhanada kóz jumdy. Keıin tártip saqshylarynyń týysqandar ekeni anyqtaldy.
Atalǵan oqıǵaǵa baılanysty QR Іshki ister mınıstri Qalmuhanbet Qasymov pikir bildirgen bolatyn. «Kúdikti kezekshilikke kelip, qarýdy qabyldaǵan. Keıin garajdan avtokólikti alýǵa shyqqan kezde, ol kúıeý balasymen ıaǵnı qaryndasynyń kúıeýimen jolyqqan. Kóz jumǵan qyzmetker kezekshiligin tapsyrýǵa kelgen. Sońǵy alty aı merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.
