Áriptesin óltirgen polıtseıdi tutqynda ustaý merzimi uzartyldy
KÓKShETAÝ. QazAqparat - Kókshetaýda áriptesin aıýandyqpen óltirgeni úshin aıyptalyp otyrǵan burynǵy polıtsııa maıory Jánibek Baımurzındi qamaýda ustaý merzimi uzartyldy, dep habarlaıdy «QazAqparat» HAA tilshisi Kókshetaý qalalyq sotyna silteme jasap.
«Kókshetaý qalalyq sotynyń 2017 jylǵy 10 aqpandaǵy qaýlysyna sáıkes, Baımurzınge qatysty qamaýda ustaý túrindegi bultartpaý sharasy 27 naýryzǵa deıin uzartyldy», - dep atap ótilgen kókshetaýlyq sot málimetinde.
Budan buryn habarlanǵandaı, Aqmola oblystyq ІІD burynǵy qyzmetkeri, polıtsııa maıory Jánibek Baımurzınge qatysty qylmysty tergeý amaldary júrip jatyr.
Eske sala keteıik, 2016 jylǵy 25 jeltoqsan kúni Kókshetaý qalalyq ІІB qyzmetkeri, aǵa leıtenant Darhan Elamanov kezekshilikten shyqqan soń, izim-qaıym joǵalyp ketedi. Keıin Darhandy jabylyp izdegen jaqyndary men oblystyq ІІD qyzmetkerleri birer kúnnen keıin óli denesin qala shetindegi Kenesary aýylynyń mańynan tabady. Kúdiktini ustaý úshin polıtseıler marqumnyń uıaly telefonyn tekserip, sońǵy ret kimdermen sóıleskenin anyqtaıdy. Keıin 26 jeltoqsanda Aqmola oblystyq ІІD qyzmetkerleri jedel-izdestirý sharalary barysynda 2016 jyldyń 25 jeltoqsanynda joǵalyp ketken aǵa leıtenant Darhan Elamanovty óltirdi degen kúdik boıynsha polıtsııa qyzmetkeri, 32 jastaǵy maıor Jánibek Baımurzındi ustaıdy. Sol kezde kúdiktiniń bergen túsiniktemelerine qaraǵanda, ol bul qylmysqa jeke jek kórýden barǵan kórinedi.
Osylaısha kúdikti eki aıǵa ýaqytsha ustaý oqshaýlaǵyshyna toǵytylyp, ústinen QRQK «Adam óltirý» baby boıynsha sotqa deıingi óndiristik is qozǵalady. Qazirgi kezde, qylmystyq isti tergeý aıasynda keshendi tergeý sharalary júrgizilip jatyr. Jaqynda Kókshetaý qalalyq sotynyń 2017 jylǵy 10 aqpandaǵy qaýlysyna sáıkes, Baımurzınge qatysty qamaýda ustaý túrindegi bultartpaý sharasy 27 naýryzǵa deıin uzartyldy.
