Áriptesin óltirgen polıtseı isi: Olar bir shańyraqta turyp, bir dastarhannan as ishken
ALMATY. QazAqparat - Almatydaǵy qylmystyq ister boıynsha mamandandyrylǵan aýdanaralyq sotta áriptesin óltirgen polıtseıdiń isi qaralýda. Búgin osy oqıǵa boıynsha kýágerler sóıledi, dep habarlaıdy QazAqparat tilshisi.
Sot otyrysynda oqıǵany óz kózimen kórgen kýágerlerdiń biri suraldy.
«26 qyrkúıekte keshki 17:30 shamasynda garaj jaqtan qalalyq ІІD ǵımaratyna qaraı kóligimmen kele jattym. Jyranyń tusynan ótip bara jatqanda eki polıtsııa qyzmetkeri bir-birin julqylap jatty. Beristemov Sábıtti julqylady. Sosyn men tapanshanyń daýsyn estidim. Biraz alǵa júrip, toqtadym. Artqy aınadan adamdardyń bári sol jaqqa jınalyp qalǵanyn baıqadym. Sosyn ary qaraı óz jumysymmen kete berdim. 40 mınýttan soń qaıtyp kelgende Sábıt Beglanulyn aýrýhanaǵa alyp ketkenin, Beristemovtyń ustalǵanyn estidim», - dedi jol polıtsııasynyń qyzmetkeri Darhan Balǵymbaev.
Kýáger sottalýshy Beristemovty tanıtynyn aıtty. Olar 2014 jyly ýnıversıtette birge oqyǵan eken.
«Biz jaqsy aralastyq. Qaıtys bolǵan jigitti men tanymaımyn», - dedi ol.
Sonymen qatar, Beristemovtyń jubaıy qaıyn sińlisi men kúıeý balasy jaıly aıtty.
«Men 2015 jyly kelin bop tústim. Sol sátten bastap Sábıtti, onyń áıelin - ózimniń qaıynsińlimdi tanımyn. Ol kezde olardyń eki qyzy bar edi. Biz bir shańyraqta turdyq, bir dastarhannan as ishtik, merekelerdi birge atap ótetinbiz. Bir jyldan soń Sábıt memlekettik baǵdarlamamen úı alyp, bólek ketti. Men olardyń qalaı ómir súrip jatqanyn bilmeımin. Ákesiniń óliminen soń Azamat kúızeliske tústi. Úıdegi barlyq problema sonyń moınyna artyldy. Osynyń bári qaıǵyly oqıǵaǵa dýshar etti dep oılaımyn. Qaıynsińlimmen araqatynasymyz jaqsy. Men ony jaqsy kóremin», - dedi Aıjan Beristemova.
Munyń aldynda polıtsııa departamentiniń psıhology Azamat Beristemovtyń psıhologııalyq ahýaly týraly aıtyp bergen bolatyn. Onyń aıtýynsha, sottalýshy ákesiniń óliminen soń psıhologııalyq jiti baqylaý tobyna engen.
Aıta ketý kerek, oqys oqıǵa 2018 jyly 26 qyrkúıekte bolǵan edi. Polıtsııa ınspektory Azamat Beristemov óziniń kúıeý balasy ári áriptesi Sábıt Beglanulyn atyp tastaǵan bolatyn.
