Áriptesin basynan atyp óltirgen polıtseı psıhologtyń esebinde turǵan

Sotta sýdıa Almaty polıtsııasynyń qyzmetkeri, psıholog Albına Saǵatbaevadan túsinikteme aldy. Shtattaǵy psıholog kúnde polıtsııa ınspektorlarynan test qabyldaıdy. Sonymen qatar, ol psıhologııalyq turǵydan jiti baqylaýdy qajet etetin qyzmetkerlerdiń jaı-kúıin baqylap otyrýǵa mindettelgen. Atap aıtqanda, ishimdik, esirtki paıdalanatyn, jaqynynan aırylǵan adamdar baqylaýda bolǵan.

Óziniń áriptesi, ári kúıeý balasy Sábıt Beglanulyn atyp óltirgen ınspektor Azamat Beristemov osydan bir jyldaı ýaqyt buryn ákesinen aırylǵan. 2018 jyly 31 naýryzda Taldyqorǵan oblystyq qorǵanys departamentiniń basshysy Berdibek Beristemovty óziniń orynbasary kabınetinde atyp óltirgen bolatyn.

Psıhologtyń aıtýynsha, sottalýshy barlyq testiden jaqsy kórsetkish jınaǵan. Psıhologııalyq turǵydan deni saý bolǵan.

«Bizdegi qyzmetkerlerdiń barlyǵy jyl basynda testileýden ótedi. Beristemov te ótti. Onyń ákesi oqqa ushqan soń, biz ony mamyrda taǵy testileýden ótkizdik. Áńgime-dúken júrgizdik. Testileý nátıjesinde onyń deni saý bolyp shyqty. Ol psıhologııalyq turǵydan turaqty, kúızeliske tózimdi kórindi. Ol tym senimdi, ózin-ózi óte joǵary baǵalaıtyn. Tik minezdi, qyrsyqtyǵy da bar edi. Sonymen qatar, adamdarmen jaqsy til tabysatyn, dostary da kóp edi», - dedi Albına Saǵatbaeva.

Al marqum bolǵan Sábıt Beglanuly basqa bólimshede qyzmet etken. Ol da psıhologııalyq táýekel tobynda bolǵan.

«Jyl basynda ony da psıhologııalyq jiti baqylaý tobyna engizdi. Óıtkeni, ol óziniń orynbasarymen kelispeı qalǵan. Bir ret ishimdik iship alyp, batalon komandırin jekpe-jekke shaqyrǵan. Odan soń onyń ornyna men taǵaıyndaldym. Jalpy alǵanda, onyń qyzmetinde eshqandaı eskertý bolǵan joq», - dedi qalalyq jol polıtsııasy arnaıy batalony komandıriniń orynbasary Erjan Muzabaev.

Sot protsesine qatysqan basqa kýálar Sábıt Beglanulyn meıirimdi, baısaldy adam retinde sıpattady.