Áriptesin balaǵattaǵan áskerı qyzmetshi qamaýǵa alyndy
ASTANA. QazAqparat - Taraz qalasynda áriptesin boqtaǵan áskerı bólimniń qyzmetshisi qamaýǵa alynyp, gaýptvahtaǵa jiberildi, dep habarlaıdy Jambyl oblystyq sotynyń saıty.
Taraz qalasy mamandandyrylǵan ákimshilik soty kóshpeli sot otyrysynda Taraz qalasynyń 5513 áskerı bóliminde Qazaqstan Respýblıkasynyń Ákimshilik quqyq buzýshylyq týraly kodeksiniń 652-baby 1-bóligimen, ıaǵnı áskerı qyzmet mindetterin oryndaý kezinde bir áskerı qyzmetshi ekinshi qyzmetshini balaǵattaǵyn boıynsha ákimshilik is qaraldy.
Áskerı bólimde áskerı qyzmetshi merzimdi áskerı qyzmetkerdiń ıyǵyna ıyǵy tıip ketkeni úshin ádepsiz sózdermen balaǵattap, onyń ar-namysyna tıetin sózder aıtqan.
Aldaǵy ýaqytta Qazaqstan Respýblıkasynyń áskerı qyzmet salasyndaǵy zańnamasyn buzýǵa jol bermeý maqsatynda sot Taraz qalasynyń 5513 áskerı bólimine baryp, áskerı bólimniń basshylyǵy men áskerı qyzmetshilerdiń qatysýymen sot protsesin júrgizdi.
Sot QR zańymen ratıfıkatsııalanǵan Azamattyq jáne saıası quqyqtar týraly halyqaralyq paktiniń 9-babynyń erejelerin basshylyqqa alyp, quqyq buzýshyǵa qatysty ákimshilik qamaýǵa alý jazasyn qoldaný qajet dep sanady.
Sot qaýlysymen áskerı qyzmetshi kináli dep tanylyp, oǵan ákimshilik jaza retinde Shymkent qalasy garnızony áskerı polıtsııa bóliminiń gaýptvahtasyna 5 (bes) táýlik merzimge qamaýǵa alyndy. Qaýly zańdy kúshine eńdi.
