Aryqtaýǵa arnalǵan peptıdtik terapııa: mınıstrlik keń taraǵan ınektsııa týraly málimdedi
ASTANA. KAZINFORM – Qazaqstandaǵy kosmetologııalyq klınıkalar salmaq tastaý maqsatynda «peptıdtik terapııa» dep atalatyn qyzmetti jıi usynyp júr. Alaıda QR Densaýlyq saqtaý mınıstrligi elimizde tirkelgen GLP-1 tobyna jatatyn preparattardyń aryqtaýǵa arnalǵan resmı nusqaýlyǵy joq ekenin jáne olardy tek dárigerdiń taǵaıyndaýymen ǵana qoldanýǵa bolatynyn málimdedi.
GLP-1 degen ne
Densaýlyq saqtaý mınıstrliginiń túsindirýinshe, GLP-1 (glıýkagonǵa uqsas peptıd-1) – tamaqtanǵannan keıin ishekte tabıǵı túrde bólinetin gormon. Ol uıqy bezine ınsýlın bólý qajettigi týraly belgi berip, tamaqtan keıin qandaǵy qant deńgeıiniń tómendeýine kómektesedi.
Sonymen qatar GLP-1 asqazannyń bosaýyn baıaýlatyp, tábetti retteıdi jáne toqtyq sezimin uzaq ýaqyt saqtaýǵa yqpal etedi.
Osy gormon negizinde GLP-1 retseptorlarynyń agonısteri ázirlengen. Bul dáriler shamamen jıyrma jyl boıy 2-tıpti qant dıabetin emdeý úshin qoldanylyp keledi. Olardyń keıbirin AQSh-tyń Azyq-túlik jáne dári-dármek sapasyn baqylaý basqarmasy (FDA) semizdikten arylý maqsatyndaǵy em-dom úshin maquldaǵan.
Qazaqstanda qandaı peptıdterge ruqsat berilgen
Mınıstrliktiń málimetinshe, Qazaqstanda GLP-1 tobyna jatatyn birneshe preparat tirkelgen. Alaıda olardyń eshqaısysynda salmaqty azaıtý nemese baqylaý jónindegi resmı nusqaýlyǵy joq.
– QR dárilik zattardyń memlekettik tiziliminde glıýkagonǵa uqsas peptıd-1 analogtary bar. Biraq olardyń tirkeý qujattarynda salmaqty azaıtý nemese ustap turýǵa qatysty emdik nusqaýlyqtar qarastyrylmaǵan, – delingen DSM-nyń resmı jaýabynda.
Qazirgi tańda Qazaqstanda myna preparattar tirkelgen: «Vıktoza» (lıraglýtıd), «Trýlısıtı» (dýlaglýtıd), «Semavık» (semaglýtıd), «Lıraglýtıd-Bıokon» (lıraglýtıd). Bul dárilerdiń barlyǵy resmı túrle 2-tıpti qant dıabetin emdeýge arnalǵan jáne tek dárigerdiń retseptisi arqyly beriledi.
Olardyń aryqtaýǵa arnalǵan kórsetilimi joq. Mınıstrlik muny tirkeý qujattarynda salmaqty baqylaý maqsatyndaǵy qaýipsizdigi men tıimdiligin dáleldeıtin jetkilikti derekterdiń bolmaýymen túsindirdi.
Sonymen birge, QR DSM semizdikti emdeý jáne salmaqty baqylaýda ustaý úshin FDA maquldaǵan preparattardy atady. Olar – Wegovy (semaglýtıd), Zepbound (tırzepatıd), Fundayo (orforglıpron) jáne Saxenda (lıraglýtıd).
Mınıstrlik qandaı qaýipti atady
Mınıstrlik kez kelgen dárilik preparatty dárigerdiń taǵaıyndaýynsyz, qarsy kórsetilimderi men klınıkalyq emdeý hattamalaryn eskermeı qoldaný adamnyń ómiri men densaýlyǵyna tikeleı qaýip tóndiretinin eskertti.
GLP-1 preparattarynyń qaýipsizdigine qatysty mınıstrlik naqty málimet berdi. Olardyń 2-tıpti qant dıabetin emdeýde tıimdiligi dáleldengen jáne jalpy alǵanda júrek-qantamyr aýrýlarynyń qaýpin arttyrmaıdy.
Alaıda birqatar jaǵymsyz áser bolýy múmkin. Olar – ınektsııa salynǵan jerdegi reaktsııalar, bas aýrýy, nazofarıngıt, keıbir jaǵdaılarda búırektiń jedel zaqymdanýy.
Al bul preparattardyń uzaq merzimdi qaýipsizdigin túpkilikti anyqtap, naqty baǵalaý úshin qosymsha ǵylymı zertteýler qajet.
Aıta keteıik, buǵan deıin aryqtaýǵa arnalǵan Ozempic jáne Wegovy preparattarynan qandaı qaýip bar ekenin jazǵanbyz.
