Arhıvtik derekterdi ǵylymı aınalymǵa engizýde tarıhshylarǵa zor jaýapkershilik júkteledi - ǵalym

ORAL. QazAqparat  - «Arhıv - 2025» baǵdarlamasy shet elderdegi tarıhymyzdy túgendeýge múmkindik beredi. Bul týraly Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń aǵa oqytýshysy, tarıh ǵylymdarynyń kandıdaty Esqaırat Haıdarov málim etti, dep habarlaıdy QazAqparat tilshisi.

Onyń aıtýynsha, Elbasynyń «Uly dalanyń jeti qyry» atty maqalasynyń eń basty ereksheligi - qazirgi zamanǵy tsıfrlyq tehnologııalar kezeńinde  qazaq eliniń  ulttyq tarıhyn jańasha turǵydan zerdeleýge, tarıhı-mádenı eskertkishterin saqtaýǵa jáne ultymyzdyń rýhanı murasyn búkil álemge tanytýǵa arnalǵandyǵy.

«Memleket basshysynyń osyǵan deıingi bastamasymen júzege asqan «Mádenı mura» baǵdarlamasy tarıhymyzdaǵy aqtańdaqtardy joıýǵa, jańa derekterdi jınaqtaýǵa múmkindik týdyrdy. Prezıdenttiń ótken jylǵy «Rýhanı jańǵyrý» baǵdarlamasy da osy máselelerge taǵy bir qozǵaý saldy. «Uly dalanyń jeti qyry» atty maqalasyndaǵy keleli oılar Elbasy ıdeıalarynyń zańdy jalǵasy dep esepteımiz. Qoǵamda memleketshildik sanany ornyqtyrý úshin tarıhı sanany damytý qajet.  Osyǵan sáıkes Memleket basshysy bul maqalada tarıhı sanany jańǵyrtýdy basty maqsat retinde qoıyp otyr», - deıdi Esqaırat Erbolatuly.

Prezıdent N.Nazarbaev óziniń tujyrymdamalyq maqalasynda ult tarıhyn ulyqtaý baǵytynda «Arhıv - 2025», «Uly dalanyń uly esimderi», «Túrki áleminiń genezısi», «Uly dalanyń ejelgi óner men tehnologııalar mýzeıi», «Dala folklory men mýzykasynyń myń jyly», «Tarıhtyń kıno óneri men televızııadaǵy kórinisi» sııaqty naqty jobalardy bolashaqta júzege asyrý kerektigin atap kórsetti. 

«Arhıv - 2025» jeti jyldyq baǵdarlamasy júzege asyrylǵan jaǵdaıda  tarıhı tyń derekterdi jınastyrýda, júıeleýde úlken kómek bolatynyna senimdimiz. Qazaq tarıhyna qatysty derekterdi arhıvterden taýyp, olardy ǵylymı aınalymǵa engizýde tarıhshylarǵa zor jaýapkershilik júkteledi. Tarıhshy ǵalymdar bul baǵdarlama aıasynda Reseı, Qytaı, Ózbekstan sekildi memleketterdiń  arhıvterinde derek jınaý jumystaryn josparly túrde júrgizer bolsa, Qazaqstan tarıhyn zertteýde serpilis bolary anyq. Prezıdent halyqty tarıhqa qurmetpen qaraýǵa, ótkennen sabaq alýǵa shaqyrady. Osyndaı ıgi ister tarıhı sanamyzdy jańǵyrtyp, ótkenimizdi taǵy bir oı eleginen ótkizýge múmkindik beredi. 
Al tarıhı sanany jańǵyrtý ulttyq sananyń oıanýyna, onyń jańa zaman talaptaryna saı qalyptasýyna jol ashady. 
Qazaq tarıhy ǵylymy da elimizdiń erteńgi damýyna, onyń táýelsizdiginiń ǵumyrly bolýyna jaýapty. Oǵan ultymyzdyń baı tarıhy men Elbasynyń qoldaýy tolyq múmkindik beredi», - dep túıindedi oıyn tarıhshy-ǵalym.